На великой вечерне:
На Господи воззвах: на 8, глас 4, подобен: Яко добля:
Храм Божий себе соделав,/ священномучениче Петре,/ Православия столп неколебимый явился еси,/ яко сотвори тя Христос утверждение/ всем, в раздорех мятущимся,/ и стену верным во время безверия,/ ограждение пастве российстей/ и врата истинныя Церкве показа тя,// Егоже моли спастися нам.
Слову Божию последовав,/ священномучениче Петре,/ пастырь быв, яко агнец заклался еси/ и, живоносным зерном в земли нашей сокрывся,/ многий плод Богу принесл еси,/ сохранив верныя люди от зла разделений,/ яко лоза многорозгная,/ уподобився во всем Христу,// Егоже моли спастися нам.
Подобно пророком во изгнаниих скитаяся,/ апостольски пожил еси,/ ничтоже имеяй и вся содержаяй,/ священномучениче Петре,/ древним святителем в ревности последуя,/ новым мучеником/ кончиною соединился еси,/ во всем житии твоем Богу послужив,// Егоже моли спастися нам.
Ины стихиры, глас 6, подобен: Все отложше:
Все возложив на Бога упование,/ святителя Тихона послушался еси,/ сан святительский приемь,/ и тому во всем последовал еси,/ в гонениих взывая:/ потщимся веру Православную сохранити/ в любви и смирении,/ и небоязненный исповедник явился еси,/ мы же, воспевающе веру твою, зовем:// моли Бога о нас.
Все отложив человеческое мудрование,/ воли Божией/ всецело предался еси, глаголя:/ житие мое страдание есть,/ егоже дни преходят,/ единаго же боюся:/ верных в смуту ввести,/ сего ради местоблюстительства не отрекаюся,/ мы же, воспевающе крепость твою, зовем: \ моли Бога о нас.
Вся отразив стрелы лукаваго,/ раскольников лживая уверения,/ братий неприятие и неповиновение,/ наветы скоро судящих,/ клевету безбожник, раздоры устрояющих,/ соблазны, устрашения и мучения,/ вся Церкве ради претерпел еси,/ мы же, воспевающе мудрость твою, зовем: \ моли Бога о нас.
Вся претерпев темницы и заточения,/ мир душевный и кротость приумножил еси,/ до смерти терпением богоборцы удивляя,/ и архипастыри смиренно увещавая,/ и призывая раскольников кротко к покаянию,/ и о мире Господа прося:/ да будут вси едино,/ мы же, воспевающе смирение твое, вопием:\моли Бога о нас.
Слава: глас 6.
Кто тебе не ублажит,/ священномучениче Петре,/ всем бо вся был еси:/ архипастырем твердое прибежище,/ верных упование,/ мучеником утверждение,/ радование монашествующим,/ правило веры сомневающимся,/ образ кротости гонимым,/ гонителей грозный обличитель,/ всем же показася свидетель Христов,/ и ныне не остави нас,/ на Небесех моляся\ помиловатися душам нашим.
И ныне: догматик.
Паримии: Нав. 1.1-9, Притч. 6.12-23, Иез. 13.1-11, 14.21-23.
На литии: стихира глас 4, подобен: Дал еси знамение:
Приял еси Моисеевы знамения:/ жезл, имже народ упасл еси и лжепастыри обличил еси,/ проказу, многия болезни претерпевый,/ кровь, мученический венец приемый,/ такожде и скрижали закона,/ егоже исполнил еси,/ всею крепостию Бога возлюбивый// и душу свою за ближних положивый.
На стиховне глас 5, подобен: Радуйся:
Радуйся, священномучениче Петре,/ Русь Православная ти взывает,/ храмы возсозидающая/ и веру обретающая,/ ейже, на тя взирающе, научаемся,/ твоему смирению подражаем,/ подвиги чтуще/ и тя прославляюще,/ Бога благодарим,\ тебе ради мир нам даровавшаго.
Радуйся, священномучениче Петре,/ утверждение наше в вере,/ военачальниче изрядный Христов,/ вся претерпети ны научаяй,/ на Бога не ропщуще/ и веру не предающе,/ да явимся вернии сыны Церкве/ и вас, Новомучеников, чада,/ за вся Бога благодаряще,\ мир или гонения нам посылающаго.
Радуйся, священномучениче Петре,/ и моли Христа Человеколюбца/ о Отечестве нашем,/ да оградит Церковь Свою от раздоров/ и светом Евангелия Русь просветит,/ возрастити чада наша/ в вере сподобит,/ даруя пастыри и учители премудрыя/ и Святыя Руси ниспосылая,/ да едиными усты/ вси Тому воспоим:\ Господи, мир Твой даждь нам.
Слава: глас тойже, самогласен.
Ликуй, граде Москво,/ прославляя новаго митрополита Петра,/ не в тебе, но неведомо где погребеннаго,/ просиявшаго же подобно древнему твоему святителю:/ той единению страны послужи,/ сей разорителей ея обличи;/ той власть святительскую возвеличи,/ сей в темницах власть любве яви,/ но якоже и той/ едино упование всея Руси быв,/ ю прослави,/ и ныне со всеми святители московскими\ за ны молится.
Тропарь, глас 2:
Божиим смотрением к святительскому служению/ святым Патриархом Тихоном призванный,/ стаду Христову явился еси страж неусыпный/ и защитник небоязненный,/ священномучениче Петре./ Жестокая заточения и дальняя изгнания,/ страдание и смерть от богоборцев претерпел еси./ Венец мученический прияв,/ на Небеси ныне радуешися./ Моли милостиваго Бога,/ да сохранит Церковь нашу от нестроений,/ единомыслие и мир людем Своим дарует// и спасет души наша.
Ин тропарь, глас 5:
Камень Российския Церкве,/ адовыми враты не одоленныя,/ явился еси, архипастырю Петре,/ услышавый Божий/ святителем Тихоном возвещенный глас:/ паси овцы Моя,/ во едином стаде их соблюдая/ и душу за них полагая,/ и, сия вся исполнив, отче,\ моли спастися душам нашим.
На утрене:
По 1-м стихословии седальны:
В лютая времена злобы сатанинския призван был еси на служение соблюсти паству Земли Русския, отче Петре; прииди и ныне невидимо и виждь беззаконие и лесть, во градех наших не оскудевающия, и молися, да обратятся люди русстии к Богу.
Слава и ныне:
Великия милости Твоя поминающе, Пресвятая Владычице, отвращаемся гордости и блуда, врагом всеваемых, с любовию Тя, Чистая, призывающе.
По 2-м стихословии седальны:
Себе отверг, Христу последовал еси и непреборимь злобою сатанинскою явился еси, егда прельстишася многия, темже и нас льстиваго избави соблазнов, наставниче духовный, учителю, отче Петре, защити, вразуми и в вере утверди ны.
Слава и ныне:
О Всемилостивая Госпоже, покрый нас от всякаго зла, и бесовских обстояний, и тьмы страстей, о нас усердно к Богу взывающи, едина Заступнице.
По полиелеи седальны:
Ликует Церковь Небесная и земная, славят тя Ангели, подвижника веры, еюже Бога на земли яве узре, святе, мучеником сотаинника и сомученика, пастыря, от погибели люди избавльшаго, мы же, земнии, предстателя тя величаем, Бога благодаряще, дивнаго во святых Своих.
Слава и ныне:
Земным неразумеваемая, Ангелом недостижимая, Бога родивши, Девою превышши всех пребываеши, и до нас достигаеши покровом Твоим, мы же, разумеюще милость Твою, Бога благодарим, дивнаго в силе Своей.
Степенна: 1-й антифон 4-го гласа.
Прокимен: Честна пред Господем смерть преподобных Его.
Стих: Что воздам Господеви о всех, яже воздаде ми;
Всякое дыхание: Евангелие от Матфея, зачало 36.
По 50-м псалме стихира, глас 6.
Святая двоице,/ предстоящая Господню Престолу,/ святителие Тихоне и Петре,/ вашим до крове страданием дивимся/ и сего болий подвиг воспеваем,/ вы бо, вземше на рамена многия тысящи овец,/ страждуще с ними, кающеся и молящеся,/ за коегождо Богу дасте ответ,/ всех бо любовию вместисте,/ и нам ныне глаголите:/ приидите, сердца наша отверсты вам;/ темже мы, чада ваша,// радующеся вас прославляем.
Канон священномученика Петра глас 6.
Песнь 1.
Казньми во Египте/ Моисей фараона обличи/ и тому невразумлену/ морскую пучину разверзе жезлом своим/ властию Богом данною,/ Израиль же гонителя видев погибель/ песнь Избавителю вопияше:\ славно бо прославися.
Единый вождь земли Русския быв, якоже Моисей, / шатания и мятежи претерпел еси, / пустынная скитания с народом разделил еси, / ныне славу Божию яве зря, за ны молишися.
Едино упование седми тысящ во Израили имя Илиино бысть, / такожде и народ наш, тя жива ведая, отче Петре, правыя веры не отступаше, / мы же вемы тя, на Небесех живущаго и о нас молящагося.
Стяжал еси, первоверховному тезоимените, того веру, / Иоаннову любовь, / Иаковлеву ревность, / якоже Павел к пастве взывая: /подражайте мне, яко аз Христу.
Богородичен: Пророчески предвозвещенная Дева, Мати Божия, / апостолом позналася еси, / святителем божественная Помощница и всем христианом непостыдный Покров.
Песнь 3.
Лук сильных изнеможе,/ мучеников же не престаше песнь:/ несть свят яко Господь,// Той судит концем земли.
От Бога безунывностию украшен,/ до смерти никогда же отчаялся еси,/ священномучениче, глаголя:/ вся страдания претерпех,/ но вем, яко Господь мя не оставляет,/ даруя душе мир;/ ныне же ты нас\ молитвою не остави.
От юности сыновне всюду/ Церкви послужив, отче,/ святительство приемь, взываеши:/ послушная чада/ Преданий церковных будите,/ взирающе на отвергшия их/ предатели и раскольники,/ и послушанием Истине\ противляйтеся льсти и гордыне.
Во всяком деле/ Бога пред собою зря,/ паче же первосвятительскаго долга/ величие разумевая,/ Церкви повредити страшился еси,/ темже дара любве/ у Бога просил еси,\ пастырство в ней полагая.
Богородичен: Рождество Твое, Богородице,/ чудесно есть,/ отрочество во Святая Святых сокрыто,/ чистота же\ и Божественное избрание непостижны.
Седален.
Чиста совесть моя есть, смерти же не страшуся, рекл еси, отче Петре, темже первосвятительства не оставляю, на возгоревшийся геенский огнь разделений взирая, грех бо расколоучительства не покрывается благочестием, ниже мученическою кровию, вы же, братие, бойтеся разделений и соблазнов, и Бог мира сокрушит сатану под ноги ваши.
Слава и ныне:
Рече Симеон Пресвятой Марии: / се, лежит Сей Младенец в знамение пререкаемо, / и Тебе Самой оружие пройдет душу. / Мы же вопием: радуйся, Благодатная.
Песнь 4.
О таинство смотрения Божия;/ и лето посещения Господня,/ освящение кровьми нашея земли,/ утверждение Церкве,/ во гладе, огне, проказе и брани/ изшел еси на спасение людей Твоих,// слава силе Твоей, Господи.
Яко Божий призыв, патриарший глас услышав, / предателем быти не восхотел еси, / многим же святителем убиенным, / провидел еси мученическую кончину свою / и, Крест взем, Христу последовал еси.
Тя призывая, рече Патриарх: / ты еси Петр, монашество твое будет глад и каменный пол темниц, / святительство — во изгнаниих, / храм же твой Небеса явится / и сослужители Ангели.
Святителя Тихона первый помощник был еси / и по смерти Промыслом Божиим преемник, / тому последовал еси, взывая: / Церковь Небесным живет и к Богу приводит, / властем же земным не противится, / яко Пилат бо власти не имут, / аще не дано было бы им свыше.
Богородичен: В храм яко Невеста введена была еси / и, Неневестная пребывши, Бога родила еси, / от века, Мати, избранная / и от младенства, Дево, призванная.
Песнь 5.
Ныне видим свет утренния зари,/ светлее солнца просиявших святых,/ имиже нощь брани пришедшее со Исаией возопиим:/ правде научитеся вси земныи,/ Господи Боже наш, мир даждь нам.
Миротворец был еси, глаголя: / вопли верных услышите, / и не дадите Божие кесареви, / и члены Тела Церкве не отсекайте, / расколы бо не врачуются, / но да будем вси едино.
Раздоры творящим взывал еси: / еда разделися Христос; / кто убо есть Петр, кто ли же Павел; / един Господь, едина вера, едина Церковь, / да будем едины в союзе мира.
Церковь Христову како обновити восхотели есте, / иного бо основания положити невозможно есть, / ты, отче, рекл еси / Патриарха предателем и преданий хулителем, / и многия от сетей спасл еси.
Яко Гефсиманскую чашу / местоблюстительство приял еси, / раскольником противостав, смуту творящим, / на Голгофу возшел еси, /волю Божию на земли совершити.
Богородичен: Благовестия архангельскаго сподобившися / и небесная земным совокупльши, Дево, / выну Благовестница христианом являешися / во утешение и обетование грядущаго Царствия.
Песнь 6.
Ионово чудесное избрание/ очищению во чреве китове/ нас трепетно молити научает:/ званым сущим избранным нам явитися/ тлению временному и промыслительному// и спасительному совоскресению.
Святителем Московским последуя,/ первее со Христом быти/ потщался еси, владыко,/ и с народом Божиим,/ и сим оружием\ гонителей победил еси.
Правды искал еси,/ Церковь Православную защищая,/ и смирением
своим/ лесть и лукавство\ сынов отца лжи отгнал еси.
Расколы безбожник обличая,/ злобою покрывающих злобу,/ отче Петре,/ вмале не уступил еси кознем их,\ мудро правя Слово Истины.
Клеветы многия устрояху/ мнящии Церковь разорити,/ ты же лукавая коварствия вся/ разорил еси,/ первосвятительства до смерти не отрекся,/ ведая Истиннаго Главу,\ Церковь Свою соблюдающаго.
Богородичен: Зряща Тя, рождшую Царя и Владыку и Творца мiра, умолкаем, Дево Чистая.
Кондак, глас 4:
Дух мирен и кроток стяжав,/ твердое упование на милосердие Божие имея,/ блюститель верный Церкве Российския/ и исповедник Христов явился еси,/ священномучениче Петре,/ присный о нас пред Богом предстателю// и молитвенниче о душах наших.
Ин кондак, глас 7.
Скорби, труды и болезни,/ суд людской немилостивый/ претерпел еси,/ первосвятителю Петре,/ но сих не устрашился еси,/ Единому Судии чист пребывая,/ Тому ныне предстояй,/ молися о нас,\ прославляющих тя.
Икос
Крепок в трудех был еси, первосвятителю, / в ранах терпелив, в темницах свободь, / глад, зиму и наготу понеся, / обаче укоряемь благословляше, / хулимый моляшеся, отче Петре, / темже наказуемь не умираше / и умершим почитаемь жив явися, / в нищете многия обогащая, / во всем слугою Божиим быв, / ныне же Христу молися о нас, прославляющих тя.
Песнь 7.
Како огненная пещь/ Богови приобщение бысть,/ попаление кумиротворения,/ отцем верности исповедание,/ Божией правды прозрение,/ яко близится падение Вавыилонское,/ отроков же во веки воспоется песнь:/ отец и наш Боже благословен еси.
Житие твое бысть яко умирание на Кресте, / всеми бо уды страдал еси, / солнца многия лета не видяй, / смрадом дыша, пищи и одра лишение терпя, / непрестанно же моляся: / Боже, благословен еси.
С разбойники заточен и с паствою разлучен был еси, / никакоже уступил еси, работати мучителем отвергаяся, / отцем же святым подобяся и вопия: / Боже, благословен еси.
Окрест ненавидимь, паствою же любимь, к ней взывал еси: / не оставите верности преданием отцев, / в подвизех и мучениих молящеся: / Боже отец наших, благословен еси.
Гласа твоего к народу боящимся и прещения умножающим, / благами же земными соблазнити тя хотящим, / рекл еси, отче: / не может христианин предателем быти.
Богородичен: Бога родила еси / и, како Той умираше, видела еси, при Кресте стоящи, / Дево, правило мучеников, / моли о всех, Честному Древу кланяющихся и Тя почитающих.
Песнь 8.
Вострепеташа халдее,/ Единаго Бога не познавшии,/ убивающее бо утвердиша живот/ и пламенем низведшее живоносный ток,/ песнь из огня яве слышаша:/ благословите сынове человечестии Господа,// пойте и превозносите во вся веки.
Смерти твоея ищущии и не обретшии, / Богу, укрепляющему тя, / о сей лживо поведаша, отче Петре, / послежде грех убийства твоего совершиша, / уготова бо тебе Господь мученический венец, / Его превозносити во веки.
Гонителем, устрашающим страданьми и затвором, / отвещал еси, отче: / не могу преступити клятвы Церкви и Патриарху, / не мните якоже един аз есмь, / со мною бо пребывает в молитвах вся паства, / еяже ради живу и умираю.
Непримиримаго врага рекшии тя, отче Петре, / всем любовь явльшаго, убивают, / ты же живота вечнаго сподобися и Церковь украси, / народ же в вере утверди, / превозносящий о тебе Господа во веки.
Всем житием твоим Церкви послужив, / смертию новый дар той приносиши, / гонителей обличая и Христа являя, / мы же последуем ти, / о земных не пекущеся по словеси твоему / и превозносяще Христа во веки.
Глаголют беззаконии: / туне страдаеши, ничтоже бо можеши делати, / не лучше ли местоблюстительства отрещися, / ты же отвеща: / не аз его избрах, / претерпевый же до конца спасется.
Богородичен: Воспеваем Успение Твое, Мати Воскресшаго из мертвых, / и со апостолы молим: / с нами до скончания века пребуди.
Песнь 9.
Твоих, Богородице, глаголов/ видим исполнение:/ низложение сильных и вознесение смиренных,/ темже в храмех и темницех,/ в печалех и радостех, в гонениих и мире// Тя, Матерь Света, величаем.
Торжествуем радостно, / тя имуще пастыря и отца, / о чадех молящагося, / и величаем непрестанно, отче Петре, / Российския Церкве похвало.
Возлюбим друг друга, братие, / вси бо есмы сродницы Новомученик святых / и Христос есть посреде нас, / Егоже не престает святитель Петр молити.
Пасхальныя радости исполняемся, / священномученика торжествующе память, / и друг друга обымем, и вся простим, / того моляще радости небесныя и нам сподобитися.
Богородичен: Светися, светися, Земле Русская, / дивный бо святый в тебе возсия, / Ты же, Чистая, красуйся, Богородице, / о прославлении предстательства Твоего.
Светилен
Егда в темнице бе, святителю Петре, / имя твое, всюду поминаемое, / Землю Русскую во единении сохрани, / ныне же тебе пребывающу на Небесех, / мы, тя призывающии, / великия милости сподобляемся, / моли спастися нам.
Богородичен: О мнозе моляще Тя, / вящших сподобляемся, / славословити же Тя, Дево, хотяще, / дар обретаем преизобилен мира и радости Божественныя, / темже величаем, поем, славим, почитаем, ублажаем, превозносим Тя, Богородице.
На хвалитех: глас 8, подобен: О преславнаго чудесе:
О преславнаго чудесе/ веры твоея, отче Петре,/ яже явися в тебе извещение уповаемых,/ вещей же обличение невидимых,/ еюже загради уста львом/ и угаси силу огненную,/ сия есть победа, победившая мiр,/ темже восхвалим сице веровавшаго,/ прославим Бога, тако благоволившаго,// воспоем Заступницу предстательствующую.
О преславнаго чудесе/ упования твоего, отче Петре,/ еже, прием шлем спасения, утвердися/ яко котвою крепкою,/ ревности положи начало,/ проповеди дерзновенныя/ и исповедания неуклоннаго,/ темже восхвалим/ сице уповавшаго,/ прославим спасение Обетовавшаго,\ воспоем в скорбех Утешающую.
О преславнаго чудесе/ любве твоея, отче Петре,/ яже долготерпит, милосердствует,/ не ищет своих си/ и не мыслит зла,/ всему веру емлет,/ вся уповает, вся терпит/ и николиже отпадает,/ темже восхвалим сице возлюбившаго,/ прославим Спасителя,/ нас искупившаго,/ воспоем Богоматерь,\ Того рождшую.
О прославления чуднаго/ твоего, отче Петре,/ поем твою крепость,/ восхваляем терпение,/ славим смирение,/ чествуем кротость,/ превозносим мудрость,/ благословим упование,/ ублажаем любовь,/ величаем веру,/ почитаем труды и страдания,/ покланяемся кончине,/ радуемся о предстательстве твоем,/ воспевающе Господа\ и Пречистую.
Слава: глас 6, подобен: Тридневен:
Преславное днесь созерцайте чудо,/ превышшее ума и словес,/ дивный бо святитель,/ добропобедный мученик,/ щедрый отец, добрый пастырь,/ славный первосвятитель,/ благословенный проповедник,/ богоглаголивый учитель,/ богодухновенный наставник,/ святый священномученик Петр\ является в храме своем нам.
И ныне: глас и подобен тойже.
Тридневно предпразднуем Ти,/ Богородице Марие,/ ведуще, яко на всякий день/ помогаеши призывающим Тя,/ темже покланяемся рождеству Твоему,/ не лиши нас\ и Небеснаго Твоего Покрова.
Молитва.
О святый священномучениче Петре, первосвятителю славный Русския Земли, что возглаголем ти языком худым? Веси бо потребное Церкви и стране нашей и помощь яве подаеши, сего ради единаго просим: тебе подобными быти нам помози, ты бо явил еси нам образ Христов, темже тя величаем и радостно славословим усты и сердцем, Бога о тебе благодаряще, ныне, и присно, и во веки веков. Аминь.
