Месяца августа в 18-й день
Празднование Пресвятей Владычице нашей Богородице и Приснодеве Марии
ради иконы Ея, именуемыя «Всецарица»
Скачать службу: .docx
НА ВЕЛИЦЕЙ ВЕЧЕРНИ
На Господи воззвах: стихиры праздника три, гл.2.
Ины стихиры Богородице, гл.8,
подобен: О преславнаго чудесе:
О преславнаго чудесе!/ Преблагословенная Богомати Всецарица/ от горы Афонския в Россию приходит./ Церковь Русская, взыграй, ликовствующи,/ святый образ Приснодевы зрящи;/ к немуже припадающе,/ благодарно Богородице возопиим:/ радуйся, землю нашу благоухания исполнившая,/ радуйся, алавастре мира Божественнаго,\ радуйся, Державная Царице.
О преславнаго чудесе!/ Всех Господь и Владыка/ от Девы воплотитися благоволи/ и плоть человечу восприяти,/ и Сын Твой наречеся, Пречистая,/ и Споручницу спасения нашего Тя яви,/ Дево Богоизбранная./ Темже веселия духовнаго исполняемся/ и славословим Тя, Мати Божия,\ Небесе и земли украшение.
О преславнаго чудесе!/ Источник исцелений присно-текий,/ от святыя иконы Твоея исходит,/ Богоблаженная Всецарице,/ и землю Русскую напояет,/ благодать неоскудную даруя./ Темже небесною лечбою/ язвы душ и телес наших уврачуй, \ Ты бо еси милости река неисто-щимая.
Приими, Дево Всепетая,/ мольбы наша, от недостойных устен возносимыя,/ покрый нас кровом крилу Твоею,/ се бо чада Твоя к Тебе взываем/ и матерним стопам Твоим припадаем,/ небеснаго утешения взыскующе./ Темже во Твое ныне заступление прибегаем,/ буди нам Стена нерушимая/ и всемощный Покров,\ и ко всякому благу Наставница.
Се притекаем Ти, Пречистая,/ многое попечение Твое о всех Тя воспевающих ведуще,/ и песненныя цветы приносим прилежно,/ и доброгласно Тя восхваляем:/ радуйся, Богокрасный Крине райский;/ радуйся, нектаре Богоизлиянный;/ радуйся, всех святых святейшая,/ Ты бо еси наша теплая ко Господу,/ Сыну Твоему, Молебница,/ и Предстательница крепкая/ о всех молящихся Тебе,/ и Целительница наша Всеблагая,\ помози нам, Владычице.
Слава и ныне: праздника, глас 4.
Приидите воспоем, людие,/ Пресвятую Деву Чистую,/ из Неяже Слово Отчее/ неизреченно пройде, воплощься,/ и воззовем, глаголюще:/ благословенна Ты в женах,/ Христа во чреве вместившая,/ молися, Пречистая,\ спастися душам нашим.
На литии: гл.4
Богоблаженная Отроковице,/ Ты еси Ангелов и человеков радование,/ Ты еси огнеобразный Владычень Престол,/ светолучныя молнии благодати испущаяй,/ вся земля да поклонится Тебе/ и Божественному Сыну Твоему./ Мы же ныне поем и песнословим Тя,/ и тепле молимся:\ не отвержи нас от лица Твоего.
О Пресвятая Мати Дево,/ Ты еси Царица всех цариц,/ добродетельми яко многоценною диадимою украшенная,/ восхваляем Тя, Всеблагословенная,/ и чествуем образ Твой святый./ И молимся Ти, Богоневесто:/ добродетелей цветы Тебе приносити сподоби нас,/ покаяния сердца наша исполни,/ и да будут молитвы наша\ яко фимиам кадильный пред Тобою.
Слава и ныне: праздника, глас 5.
Воспойте, людие,/ Матерь Бога нашего:/ днесь бо всесветлую душу Свою/ в пречистыя длани,/ Иже из Нея воплощшагося без семене предает:/ Егоже и молит непрестанно,/ даровати вселенней мир,\ и велию милость.
На стиховне: гл.5, подобен: Радуйся:
Радуйся, земле Русская,/ чудотворный образ Всецарицы зрящи, / Тая бо яко звезда светозарная/ на небосводе церковнем/ лучами милости тя объемлет. / Приидите, людие,/ припадем к нескверной Отроковице, / болезни вся исцеляющей,/ и молимся:/ облегчи злострадания наша,/ от духов злобы свободи\ и печали наша утоли.
Стих: Слыши, Дщи, и виждь,/ и приклони ухо Твое.
Радуйся, земле Русская,/ Пресвятыя Богородицы доме,/ красуйся и торжествуй,/ дар драгоценный восприимши,/ от Святыя горы Афонския,/ многоцелебный образ Приснодевы;/ емуже с верою покланяющеся,/ душам нашим/ благопременения просим и взываем:/ о Благословенная Царице,/ не остави нас,/ помощь спасительную подающи,\ и Небесным предстательством Твоим утеши.
Стих: Клятся Господь Давиду истиною,/ и не отвержется ея.
Радуйся, земле Русская,/ се бо образ небосветлый/ Марии Девы Всецарицы/ к веселию верныя созывает;/ мы же, на неизреченную благость Тоя= уповающе,/ мольбы прилежно приносим:/ о Мати Всеблагая,/ благочестия добро=тами преукра=шенная,/ облецы ны во одежды целомудрия\ и всемощное Твое заступление подаждь.
Слава и ныне: праздника, глас 4:
Давидскую песнь днесь, людие,/ воспоем Христу Богу:/ приведутся, рече, Царю девы в след Ея,/ и искренняя Ея приведутся/ в веселии и радовании./ От семене бо Давидова,/ Еяже ради мы обожихомся,/ в руце Своего Сына и Владыки,/ славно и паче слова прелагается,/ Юже яко Матерь Божию воспевающе,/ вопием и глаголем:/ спаси нас, исповедающих Тя, Богородицу,/ от всякаго обстояния\ и избави от бед души наша.
Тропарь, глас 4:
Образом радостотворным Честныя Всецарицы, / желанием теплым взыскающих благодати Твоея / спаси, Владычице; / избави от обстояний к Тебе прибегающих; / от всякия напасти огради стадо Твое, // к заступлению Твоему взывающее присно.
НА УТРЕНИ
По 1-м стихословии седален, глас 4:
Благослови ны, во юдоли земной странствующия, Всесвятая Богородительнице, Небесе и земли Царице, да песньми и пеньми ликовствующе, воспоем пришествие святаго образа Твоего.
Слава и ныне: праздника, глас тойже,
подобен: Явился еси днесь:
В славней памяти Твоей вселенная невещественным Духом преукрашена, умно с веселием зовет Ти: радуйся, Дево, христиан Похвало.
По 2-м стихословии седален, глас 6:
Покаяния двери отверзи нам, Госпоже, и сокрушения исполни сердца наша, да обрящем предстательством Твоим грехов оставление и недугов исцеление.
Слава и ныне: праздника, глас тойже.
Подобен: Милосердия двери:
Твое преставление, Чистая, вси вернии восхваляюще, поем Ти: преставилася еси от земли, от живота в живот, и сущи на Небесех Богу молящися избавитися от бед роду человеческому.
По полиелеи седален, глас 4:
Ныне приспе день светлаго торжества/, вся земля Русская радуется/ пришествию честнаго и многоцелебнаго образа/ Пресвятыя Богородицы Всецарицы./ Сей бо якоже солнце незаходимое/ возсия светозарными лучами,/ разгоняя тьму искушений же и бед/ от вопиющих верно:/ спаси ны заступлением Твоим,\ Всеблагая Владычице.
Слава и ныне: праздника, глас тойже,
подобен: Удивися Иосиф:
Возопий Давиде,/ что сей праздник,/ егоже воспел еси древле/ в книзе псаломстей?/ Яко Дщерь Богоотроковицу и Деву,/ преложи Ю на оны обители Христос,/ Иже из Нея без семене рождься./ И сего ради/ радуются матери и дщери,/ и невесты Христовы, вопиюще:\ радуйся Преставившаяся к Вышнему Царствию.
По 50-м псалме стихира, глас 6:
Радуйся, Богоблагодатная Дево,/ радуйся, златозарная Заре/ света невечерняго,/ радуйся, неугасимая милости Лампадо,/ елеем радования/ сердца наша умащающая,/ радуйся, христиан Упование,/ радуйся, ненадежных Надеждо,\ радуйся, Радосте наша.
Канон, гл. 4
Песнь 1
Ирмос: Отверзу уста моя…
О Преблагая Заступнице наша, недоумеем песнословити Тя по достоянию, обаче любовию понуждаеми, молим Тя: сподоби принести Ти песни благодарственныя.
Приидите, вернии, ко всечестному образу Богородицы Всецарицы припадем, обымем сердцем и лобызаем устнами, со умилением молящеся Всемилостивой Владычице.
От Небесных славимая и от земных ублажаемая, девственными добротами преисполненная, Пречистая Дево, приими моления наша и призри на нас благоуветливым взором Твоим.
Дивны чудеса Твоя, Господи, яко даровал еси мiру преславную Богоотроковицу Марию, от всех родов произбранную во спасение рода человеческаго.
Песнь 3
Ирмос: Твоя песнословцы Богородице…
Ты еси источник златоструйный,/ утешение сердцам скорбящим точаяй,/ о Царице Дево./ Ободри ны во искушениих,/ от отчаяния избави/ и слезы в росу\ небесныя радости претвори.
Молим Тя о сродницех наших,/ Госпоже Всецарице,/ исцели недуги неисцельныя,/ устави раковыя язвы стужение,/ терпение неистощимое страждущим даруй/ и водами покаяния\ сердца их омый.
Любовию и молитвами Твоими, Богомати,/ возжзи в сердцах наших светильники,/ огнем небесным/ молитвы и любве\ пламенеющия.
О Всесветлая Владычице,/ покрый нас честным Твоим омофором/ и светоносными благодати лучами/ отжени темный облак\ печалей наших.
Кондак и икос праздника.
Седален, гл.8:
Днесь празднуем пришествие честнаго образа Твоего, Мати Божия, к немуже с верою припадаем, Всеблаженная, и молим Тя: посети сущия в болезнех и печалех и покрый от бед и зол рабы Твоя.
Слава и ныне: праздника, глас тойже.
Песнь 4
Ирмос: Седяй в славе…
В знои неисцельных болезней страждущим капли небеснаго милосердия Твоего одожди, Пречистая, и благодати прохладою услади души изнемогающия.
Купина Тя неопальная прообразова, Царице, яко не опали Твое чрево огнь Божества. Темже молим Тя: огня вечнующаго избави ны.
От святаго Ангела пищу небесную приемлющи, под сению храма Господня пребываше, Дево Нетленная, напитай убо и нас Животворящим Хлебом Небесным, Пречистым Телом и Божественною Кровию Сына Твоего, Христа Спаса нашего.
Радуйся, Богоизбранная Отроковице, одушевленный Храме, Чертоже Слова Божия, во святый храм во младенческих летех введенная и тамо воспитанная. Темже молим Тя: научи ны ко храму Божию прилежати и сподоби Святых Таин в снабдение душ наших до конца земнаго жития нашего причащатися, и Царствие Небесное улучити нам исходатайствуй.
Песнь 5
Ирмос: Ужасошася всяческая…
О Всеблаженная Богомати, согрешающих исправление, умягчи изсохшую землю сердец наших, да приемше семена слова Божия, плоды достойныя принесем Владыце Христу.
Погибших Ты еси Взыскание, Приснодево Марие, и Ходатаица о нас к Сыну Твоему и Богу, и Пристанище спасительное обуреваемым в море житейстем и погружаемым напастьми многими.
Токами благодати, чрез святый образ Твой, Всецарице, на нас изливаемыми, омый наших грехов скверну и угаси страстей пещь, да обрящем чистоту сердечную и да уневестим души Христу Спасу нашему.
Радуйся, Всепетая Царице; молим Тя мы, недостойнии: зарю, к свету наставляющу, возсияй душам нашим, рождшая Солнце правды Христа, радость и спасение мiру.
Песнь 6
Ирмос: Божественное сие и всечестное…
Не возгнушайся нас, многогрешных,/ сладкоуханный Крине чистоты,/ отжени от нас/ плотское мудрование,/ устави молву лукавых помышлений/ и научи добродетелей благоухание\ Творцу выну приносити.
Помози нам, Богоневесто,/ смирен нрав стяжати,/ всегда радоватися,/ за вся Творца благодарити,\ непрестанно молящеся Тому.
Пришествием иконы Твоея озаряеми,/ молим Тя, Всецарице,/ буди нам, грешным, Споручница,/ на стези спасительныя настави,/ побори борющия ны/ и победу непобедимую\ во бранех даруй.
О чистая Голубице,/ Нескверная Агнице,/ Агнца и Пастыря/ неизреченно рождшая,/ воистину Ты еси ангельских чинов превысшая,/ умоли о нас\ Божественнаго Сына Твоего.
Кондак, гл 8:
Новоявленней Твоей иконе/ предстояще вернии,/ умильно воспеваем Ти:/ ниспосли цельбы/ к Тебе притекающим ныне рабом Твоим,/ да вси радостно зовем:/ радуйся, Всецарице,\ недуги наша благодатию исцеляющая.
Икос:
Ангел предстатель с Небесе сшед, рече Всецарице: радуйся! И боговещанным гласом воплощаема Тя зря, Господи, возопи к Ней таковая: радуйся, главизно нашего спасения; радуйся, Исполнение Зиждителева смотрения. Радуйся, яко Тобою Бог воплотися, радуйся, яко Невидимый в Тебе изобразися. Радуйся, Милость мира внутрь приявшая; радуйся, одеяние плоти Слову соткавшая. Радуйся, уму непостижная Горняя Славо; радуйся, сердца оживившая Небесная Манно. Радуйся, Звездо, благодати сияние; радуйся, Источниче, живыя воды излияние. Радуйся, Богородице, в женах благословенная; радуйся, рождшая Спаса, Дево нетленная. Радуйся, Всецарице, недуги наша благодатию исцеляющая.
Песнь 7
Ирмос: Не послужиша твари богомудрии…
Сподоби ны, Преблагая Богородительнице, преславное имя Иисусово умом и сердцем призывати, да крепость в скорбех и печалех обретем, в покаянии поприще наше совершающе и зовуще: Благословен еси, Боже отец наших.
Притецыте, вси, здравия ищущии, ко Благосердой Деве Марии Богородице, воду жизни от источника спасительнаго почерпающе и Сына Ея восхвалюще: Благословен еси, Боже отец наших.
Благословен еси, Господи Иисусе Христе, Спасителю наш, яко в час крестных страданий Твоих благоволил еси заступлению Пречистыя Матере Твоея род христианский поручити, нас немощных и убозих чадами Ея соделав. Темже благодарственне вопием: Благословен еси, Боже отец наших.
Радуйся, одушевленная Палато Божества, едина Неискусомужная Дево, во утробу неискусобрачную Бога вместившая, темже с Гавриилом Архангелом вопием Ти: благословенна Ты в женах и благословен Плод чрева Твоего.
Песнь 8
Ирмос: Отроки благочестивыя в пещи…
О Богомати Всецарице, просвети ны познанием Сына Твоего, да наследствуем Царствие Небесное, Господа же восхвалим и воспоем, и превозносим Его во вся веки.
В немощи нашей сила Божия да совершается, души и телеса наша исцеляющая и спасение вечное нам дарующая. Темже сподоби ны, Госпоже, со благодарением терпети вся посылаемая нам и не остави ны благодатною помощию, хвалящих и воспевающих и превозносящих Господа во вся веки.
Умири сердца наша и в тишине помыслы соблюди, Всесвятая Мати Дево, да молящеся на всяко время духом, Господа хвалим, поем и превозносим во вся веки.
Во Успении мира не оставила еси, Богомати, но присно с нами пребываеши и предстательством Твоим нас спасаеши, темже воспеваем Тя во вся веки.
Песнь 9
Ирмос: Всяк земнородный да взыграется…
О Царице Дево, язвы раковыя предивная Целительнице, в долгонедужии сущим яви благоволение Свое и здравие подаждь, да воспевают выну Тя, Всеблагая Мати Божия.
Неможение наше зрящи, Владычице, приими смиренная моления наша, ко спасению Благая Путеводительница нам буди и настави ны путем тесным шествовати ко пространству жизни вечныя. Мы же не престанем благодаряще величати Тя.
О милосердия и утешения Мати, ущедри ны неизреченною Твоею благостынею и благослови ны, тепле воспевающия Тя.
Весь род христианский ублажает Тя, Пречистая, яко призре Господь на смирение Твое и сотвори Ти величие неисповедимое.
Светилен:
Светел есть честный праздник иконы Твоея, Всецарице, егоже в торжестве духовнем благолепно совершающе, величаем Тя, светоносная Скиние Христа, Царя и Бога нашего.
Слава и ныне: праздника.
На хвалитех стихиры праздника 3
и Всецарице, гл.1
подобен: Небесных чинов:
Небесных чинов радование,/ и земнородных крепкое упование,/ Луче пресветлая Небеснаго Царствия,/ Пресвятая Всецарице,/ приими ны чествующия Тя,/ да Тобою водими\ сподобимся спасения вечнаго.
Светом Небесным осиянная,/ Отроковице Мати всех Царя Христа,/ таинству сокровенному/ неизреченно послужившая,/ милость Свою чрез святыя иконы Твоя/ людем дарующая,/ к Горнему умы и сердца наша возведи\ и благодати лучами просвети.
Небесный Хлеб во чреве приемши,/ Мати Спаса нашего,/ Жизнь и Свет всего мiра/ родила еси,/ просвети убо души наша,/ грехми омраченныя,/ да верою и любовию/ к Источнику безсмертия приступим\ и причастницы жизни вечныя будем.
Слава и ныне: праздника, глас тойже:
Всечестное Твое успение,/ Пресвятая Дева Чистая,/ ангел множества на небеси,/ и человеческий род на земли ублажаем,/ яко Мати была еси / Творца всех, Христа Бога./ Того молящи/ не престай о нас, молимся,/ иже на Тя с Богом упование положших,/ Богородице Всепетая\ и Неискусо-брачная.
