Богородице Пречистая, доме, егоже созда Себе Премудрость Божия, даров духовных Подательнице, от мiра к премiрным ум наш возводящая и к познанию истины приводящая! Приими молитвы от нас, недостойных раб Твоих, с верою и умилением покланяющихся пред пречистым образом Твоим. Умоли Сына Твоего и Бога нашего, да дарует властем нашим мудрость и силу, судиям правду и нелицеприятие, пастырем мудрость духовную, ревность и бдение о душах пасомых, наставником смиренномудрие, чадом послушание, всем же нам дух разума и благочестия, дух смирения и кротости, дух целомудрия и терпения, чистоты и правды. И ныне, всепетая, вселюбимая наша Мати, подай нам ума прибавление, умири, соедини во вражде и разделении сущия и положи им союз любве неразрушимый, всех заблуждших от неразумия к свету истины Христовы обрати, страху Божию, воздержанию и трудолюбию научи, слово премудрости и душеполезное знание просящим даруй, осени нас вечною радостию, Херувимов светлейши и Серафимов честнейши сущая. Мы же, славная дела и многоразумную премудрость Божию в мiре и жизни нашей видяще, устранимся земныя суеты и излишних житейских попечений и ум и сердце наше на Небеса возведем, яко да Твоим заступлением и помощию славу, хвалу, благодарение и поклонение в Троице славимому Богу и всех Создателю возсылаем, ныне и присно, и во веки веков. Аминь.
Меню
