Тропарь, глас 7
Нищету Христову возлюбивши,/ безсмертныя трапезы ныне наслаждаешися,/ безумием мнимым безумие мира обличивши,/ смирением крестным силу Божию восприяла еси,/ сего ради дар чудодейственныя помощи стяжавшая,/ Ксение блаженная, моли Христа Бога// избавитися нам от всякаго зла покаянием.
Акафист святой блаженной Ксении Петербургской
Кондак 1
Избранная угодница Христова, святая блаженная Ксение, хвалебное пение ти приносим, чтуще терпение твое и злострадание вольное; ты же, имеющи дерзновение ко Господу, во всяких бедах и напастех заступай нас, грешных, взывающих к тебе:
Радуйся, Ксение блаженная, молитвеннице о душах наших.
Икос 1
Равноангельски на земли пожила еси, блаженная мати, по успении мужа твоего, без приуготовления христианскаго внезапу скончавшагося, отвергла еси жизнь мiрскую, Бога молящи супруга твоего душу помиловати, подвиг юродства на себе приявши, стяжала еси совершенство духовное. Того ради услыши от нас похвалы сия, тебе возносимыя:
Радуйся, Христова угоднице, в мiре надмiрно пожившая;
радуйся вся прилоги мiра, плоти и диавола победившая.
Радуйся, нищету вольную на весь век избравшая;
радуйся, сокровище вечное на Небеси улучившая.
Радуйся, печали и скорби безропотно сносившая;
радуйся, народом православным любимая и славимая.
Радуйся, о часе смертнем помнити нас призывающая;
радуйся, ближняго душу паче мiра сего любити научающая.
Радуйся, Ксение блаженная, молитвеннице о душах наших.
Кондак 2
Видяще странное житие твое, блаженная, яко во цвете младости твоея во одежду мужа твоего усопшаго облеклася еси, именем его нареклася еси, себе умершу быти глаголющи, дом же твой и вся благая земная оставивши, скиталицу себе сотворила еси, сродницы безумною тя быти мняху, людие же боголюбивии воспеша: Аллилуиа.
Икос 2
Разум, от Бога ти дарованный, во безумии мнимом сокрыла еси, блаженная Ксение, в суете града великаго аки пустынница пребывала еси, молитвы к Богу возносящи непрестанно. Мы же, дивящеся житию твоему, воспеваем ти сице:
Радуйся, крест юродства тяжкий, от Бога ти данный, на рамо свое приявшая;
радуйся, именем мужеским нарекшися, немощи женския отрешившаяся.
Радуйся, все имение твое бедным людем раздавшая;
радуйся, жилище Духу Святому в сердце твоем уготовившая.
Радуйся, мнимым безумием сияние благодати сокрывшая;
радуйся, любовию твоею ангели возвеселившая.
Радуйся, всем прибегающим к тебе благое утешение;
радуйся, от смерти внезапныя избавление.
Радуйся, Ксение блаженная, молитвеннице о душах наших.
Кондак 3
Силою, свыше ти дарованною, благодатию и мужеством зной и стужу лютую претерпевала еси, всенощно молящися и поклоны творящи, темже и прославлена бысть святость твоя, блаженная Ксение, во Отечестве нашем многострадальнем и во всем мiре православнем, да зовем с тобою Богу: Аллилуиа.
Икос 3
Имела еси, о мати блаженная, небо покров и землю ложе свое, о теле, во одежду ветхую облеченнем, небрегла еси, молитвы же к Богу пламенне возносила еси, сего ради воспеваем ти сице:
Радуйся, век твой земный без крова проведшая;
радуйся, Небеснаго крова взыскавшая и того улучившая.
Радуйся, по вся времены года нощию в поле молившаяся;
радуйся, поклоны земныя на вся страны света тамо творившая.
Радуйся, град Петра апостола всенощным бдением от бед ограждавшая;
радуйся, гнев Божий от него многажды отвращавшая.
Радуйся, благодатию Духа Святаго чудесно согреваемая;
радуйся, хлад лютый душ наших молитвою твоею растопляющая.
Радуйся, Ксение блаженная, молитвеннице о душах наших.
Кондак 4
Бурю житейскую, на стогнах града твоего мятущуюся, кротостию и незлобием препобеждала еси, мати блаженная, безстрастие же посреде мiра дольняго стяжала еси, и тако, Духом Святым просвещаемая, взывала еси подателю тишины сердечныя Богу: Аллилуиа.
Икос 4
Слышаша людие дар прозрения чудный, тобою явленный, святая мати, и дивишася. Се, жене некоей рекла еси: возьми пятак, зде царь на коне, потухнет. Та же, не ведающи, яко ты запаление дома ея прозрела еси, притече во своя си и узре дом свой во огни горящ, и абие по молитве твоея пламень огня угасе. Мнози же страждущии к помощи твоей прибегаху, юже стяжавше, тако взываша ти:
Радуйся, дар прозрения смирением крайним стяжавшая;
радуйся, дар сей во благо и спасение страждущим являвшая.
Радуйся, свеще негасимая, к Богу в молитвах горевшая;
радуйся, верою твоею пламенною запаление домов угашавшая.
Радуйся, грядущия скорби людския аки настоящия зревшая;
радуйся, врач безмездный и милосердый людем бывшая.
Радуйся, яко и нас немощных в вере укрепляеши;
радуйся, яко сиянием святости твоея род православный озаряеши.
Радуйся, Ксение блаженная, молитвеннице о душах наших.
Кондак 5
Боготечная звезда явися святость твоя на тверди града Петрова, угоднице Божия, зарею своею сердца просвещающая: уже бо людем, во безумии греха погибающим, явила еси путь спасения, к покаянию их призывающи, во еже вопити Богу: Аллилуиа.
Икос 5
Видяще подвиги твоя молитвенныя, терпение хлада и зноя великое, людие ослабити желаху злострадания твоя, ты же одежду и вся ими приносимая нищим раздавала еси, нищету свою аки сокровище хранящи, сего ради слышиши от нас сицевая:
Радуйся, богатство твое токмо в любви к Богу и ближним полагавшая;
радуйся, ничтоже земное имевшая и всех духовно богатившая.
Радуйся, милостивым твоим сердцем страждущим сострадавшая;
радуйся, помощь им чрез людей добрых посылавшая.
Радуйся, мiру чуждая, в мiре живущим благая творившая;
радуйся, века сего суемудрия отвергатися научившая.
Радуйся, плакати со плачущими нас подвигающая;
радуйся, от сна тяжкаго греховнаго пробуждающая.
Радуйся, Ксение блаженная, молитвеннице о душах наших.
Кондак 6
Проповедана бысть святость жития твоего, блаженная, жителем града твоего, егда ты о младенце, еще не рождшемся, пекущися, жене добрей, в доме, тобою дарованном, жившей, рекла еси: Бог тебе сына послал, теки скорее на кладбище Смоленское. Тая же, притекши, сироту, рожденна материю, внезапу на пути пострадавшею и скончавшеюся, в дом свой прияла есть. Вся же лета жития своего, тебе благодаряще, семья сия благодатная Богу Человеколюбцу взываше: Аллилуиа.
Икос 6
Возсияла есть слава подвигов твоих, блаженная мати Ксение, егда ты нощию на верх храма Смоленскаго камение, таящися, воздвизала еси, дому Пречистыя возградитися пособствующи. Ныне же вси молящиися во святем храме сем и во всем мiре Божием, на образ твой взирающе, воспевают ти таковая:
Радуйся, к подвигом благочестия всех призывающая;
радуйся, тайно творити добро научающая.
Радуйся, храмы Божия зиждущим помогающая;
радуйся, святыню церковную возлюбившая.
Радуйся, в делех благих усердное поспешение;
радуйся, трудов наших на пути спасения облегчение.
Радуйся, под кровом Божия Матере подвиги творившая и тако почившая;
радуйся, с Нею ныне на Небеси о нас Христа молящая.
Радуйся, Ксение блаженная, молитвеннице о душах наших.
Кондак 7
Хотяще судьбы людския во благая устроити, повелела еси деве кротцей на Охту тещи, прорекши: муж твой тамо жену погребает. Та же, аще и недоумеваше, обаче не ослушася глагола твоего, и тамо вдовца млада, над гробом жены рыдавша, сретила есть и утешение в молитве ему подаде. Лету же минувшу, они венчастася. И тако в любве и согласии многая лета поживше, чад своих наставляху тебе, святая мати, чтити, Богу же воспевати песнь: Аллилуиа.
Икос 7
Новое чудо показала еси, блаженная, посреде скверны людския юродством сокрытую душу твою в кротости ангельстей соблюдши. Научи и нас, мати Ксение, и малыя доли скорбей твоих не терпящих и в ропоте на Бога и ближняго дни наша иждивающих, вся свыше посылаемая в терпении сносити, да взирающе на подвиги твоя, чистым сердцем зовем ти сице:
Радуйся, мiру злохладному благодатную мудрость явившая;
радуйся, нищеты духовныя блаженство вкусившая.
Радуйся, образ терпения и благосердия нам подающая;
радуйся, смирением и покаянием от бед избавлятися научающая.
Радуйся, с молитвою и любовию детей благословлявшая;
радуйся, прикосновением руку твоею чудесно их исцелявшая.
Радуйся, тоску тяжкую, душу сокрушающую, от нас отводящая;
радуйся, надеждою несумненною на милость Божию окриляющая.
Радуйся, Ксение блаженная, молитвеннице о душах наших.
Кондак 8
Странница бездомная протекла еси путь скорбный жития твоего в стольнем граде Отечества нашего, мати блаженная, взыскующи Града Вышняго, Иерусалима Небеснаго, ныне же в нем со ангелы и всеми святыми поеши Богу: Аллилуиа.
Икос 8
Вся в молитвах ко Творцу пребывающи, мати святая, до успения твоего, от страданий и подвигов к жизни блаженней и вечней невозбранно прешла еси. Сего ради, преклоняюще колена сердец наших, благоговейное пение ти приносим:
Радуйся, во обителех горних с лики святых ликующая;
радуйся, и нас, тебе молящихся, тамо не забывающая.
Радуйся, чудеса неизчетная по успении твоем явившая;
радуйся, смертно болящих, врачами оставленных, исцелявшая.
Радуйся, во пиянстве гибнущих устрашение и исправление;
радуйся, места служения лишившимся благое поспешение.
Радуйся, вдовиц и жен, супругом оставленных, покровительнице;
радуйся, странников и безприютных хранительнице.
Радуйся, Ксение блаженная, молитвеннице о душах наших.
Кондак 9
Всякия утоли болезни, блаженая мати Ксение, на тя надеющихся и к помощи твоей усердно притекающих. Якоже прежде завещала еси поминати душу твою ради души своея спасения, тако и ныне помяни у Престола Божия всех прославляющих тя, Богу же вопиющих непрестанно: Аллилуиа.
Икос 9
Ветия суемудренныя разумети не могут, како ты безумием своим безумие мiра сего обличила еси и немощию своею сильныя и крепкия посрамила еси: не ведают бо в тебе силы и премудрости Божия. Мы же, тя почитающе, с любовию зовем ти сице:
Радуйся, Божественнаго Духа селение;
радуйся, велие к Богу дерзновение.
Радуйся, близ усыпальницы твоея молящимся являющаяся и им помогающая;
радуйся, землею и елеем от нея многия освятившия и от недуг исцелившая.
Радуйся, яко одержимых страстьми от гибели спасаеши;
радуйся, яко отвергатися себе нас научаеши.
Радуйся, любве и смирения путь во спасение нам открывающая;
радуйся, души наша к жизни будущаго века готовящая.
Радуйся, Ксение блаженная, молитвеннице о душах наших.
Кондак 10
Спасти люди хотящи, блаженная мати Ксение, присно даруеши им заступление твое чудное. Се деву благочестивую, со вдовицею материю ея в канун венчания у гробницы твоея усердно молившуюся, от брака спасла еси со злодеем, иже ратнаго человека уби, имя же и чин его себе присвои. В день тойже убийца оный внезапу обличен бысть, и ужасом объят, исповеда пред всеми, яко сила Божия сироту от брака с ним избави. Мы же, дивящеся силе молитв твоих спасающих, воспеваем Богу: Аллилуиа.
Икос 10
Стена еси нерушимая, преблаженная мати, семьям православных. Не остави и ныне супруги разлученныя, помози родителем, за грехи своя о чадех слезы проливающим, научи юноши и девы в чистоте себе хранити и всех нас святыню уз семейных почитати, да единеми усты воспеваем ти тако:
Радуйся, дев благочестивых от брака невернаго избавляющая;
радуйся, сопутника жизни добраго им обрести помогающая.
Радуйся, сродник враждующих благое примирение;
радуйся, слез детских осушение.
Радуйся, о убиении младенцев во чреве женам мыслити запрещающая;
радуйся, на камени любве и веры домы устрояющая.
Радуйся, супругов, смертию разлученных, утешение;
радуйся, в жизни безсмертней вечное их соединение.
Радуйся, Ксение блаженная, молитвеннице о душах наших.
Кондак 11
Пение благодарственное приносят ти, мати блаженная, людие православнии, от бед и болезней молитвами твоими избавлении. И ныне, аще попустит нам Всеправедный Господь скорби грех наших ради, со слезами к тебе припадем, уповающе на милостивое твое о нас к Богу предстательство, да воспоем Ему: Аллилуиа.
Икос 11
Светозарная луча, во мраце жития сего путь ко Свету Неприступному освещающая, явилася еси, богомудрая Ксение, чудес множеством просиявши. В лютую же годину гонений безбожных вернии от часовни твоея не отступиша, но, презревше и страх смертный, с верою и упованием к тебе притекаху, сердцем воспевающе сице:
Радуйся, безнадежных надеяние;
радуйся, в бездне отчаяния погибающих спасение.
Радуйся, униженных и гонимых покровительнице;
радуйся, от клеветы и суда неправеднаго защитнице.
Радуйся, обидимых и обездоленных ограждение;
радуйся, обидящих грозное вразумление.
Радуйся, града святаго Петра небесная заступнице;
радуйся, чадом земли Российския мати и питательнице.
Радуйся, Ксение блаженная, молитвеннице о душах наших.
Кондак 12
Благодать утешений обильно изливаеши, блаженная Ксение, всем чтущим память твою и к заступлению твоему притекающим. Темже и мы, грешнии, по Бозе на тя надежду нашу возлагаем и молимся тебе усердно: не остави нас во обстояниих скорбных, умоли Господа сил, да не отпадем от веры православныя, в нейже тобою утверждаеми, зовем Ему верно: Аллилуиа.
Икос 12
Поюще многая твоя чудеса, блаженная мати Ксение, восхваляем тя, яко теплую нашу заступницу и скорую предстательницу. Улучающе же от тебе помощь благодатную, неустанно воспеваем ти сице:
Радуйся, светом кротости твоея вся концы земли озарившая;
радуйся житием постническим гордыню диавольскую посрамившая.
Радуйся, дому Царскому поможение и благословение;
радуйся, мира Божия в сердца верных принесение.
Радуйся, о спасении Отечества нашего присно молящаяся;
радуйся во Отечество Небесное путь нам указующая.
Радуйся, по Богородице в скорбех и печалех наше утешение;
радуйся, по Бозе грехов наших прощение и вечное спасение.
Радуйся, Ксение блаженная, молитвеннице о душах наших.
Кондак 13
О святая блаженная мати Ксение, в житии твоем крест тяжкий понесшая, приими от нас грешных моление сие, тебе приносимое, огради нас молитвами твоими от наветов духов тьмы, от бед и напастей, умоли Всещедраго Бога подати нам силу и крепость, да вземше крест свой, во след Христу грядем, поюще Ему с тобою во веки: Аллилуиа.
(Этот кондак читается трижды, затем икос 1 и кондак 1)
