Советы приходящим в храм

Наш адрес

140130, Московская обл., Раменский г.о., д.п.Кратово, ул.Нижегородская, д. 17

тел. (495) 556-10-43,

(925) 654-19-11

Схема проезда

Богослужение

24.01.13

Служба святой блаженной Ксении Петербургской

 

Месяца января в 24-й день.

Служба святей, Блаженней во Христе Ксении,

бездомней страннице Петрова града.

Творим бдение.

На малей вечерни

На Господи воззвах, стихиры на 4, глас 1.

Подобен: Небесных чинов:

Бездомная на земли сущи,/ дом и жилище Духу Святому/ в сердце своем уготовала еси/ смирением твоим,/ и ныне  в чертозе Христове радуешися,/ блаженная Ксение, Богу присная.

Дважды.

Внезапу твоему мужу умершу,/ умре мирскаго жития желание в тебе,/ всю себе Христу предала еси,/ яко лишенная разума миру являющися,/ и жизни вечныя взыскала еси.

Бездомная и чуждая мiру,/ едино прибежище Христа взыскала еси, Ксение,/ Богу и людям ближняя,/ ныне же во Царствии Христове радующися,/ помяни твоя ближняя,/ к твоему предстательству прибегающия.

Слава и ныне: Богородичен, самоподобен:

Небесных чинов радование,/ на земли человеков крепкое предстательство,/ Пречистая Дево,/ спаси ны, иже к Тебе прибегающия,/ яко на Тя упование/ по Бозе, Богородице, возложихом.

Таже: Свете тихий:

Прокимен дне. И по «Сподоби Господи в вечер сей»:

На стиховне стихиры, глас 6:

Подобен: Тридневен вокресл еси:

Чуждая мiру, но сущих в нем не чуждающаяся,/ о людех милосердствующи,/ юрода словущи,/ мудрости наставляеши,/ всяко терпящи, страждущия целиши:/ сила бо Христова/ в твоей немощи совершается.

Стих: Господь хранит пришельцы, сира и вдову приимет.

Земное богатство, Ксение, раздала еси,/ яко неправедное,/ и дома кров отвергла еси,/ милостию Божиею покрывающися./ Странствию Христову ревнующи,/ Царствия Христова достигла еси.

   Стих: Господь возводит низверженныя, Господь любит праведники.

Образ терпения и незлобия, Ксение, явила еси,/ юродство мiра обличивши./ Предстательство твое к Богу вемы:/  помолися за ны в нуждх наших,/ бездомныя же и отечествия лищенныя,/ Отечествия Небеснаго достигнути настави.

Слава и ныне: Богородичне, глас и подобен тойже:

Любы изсяче, умножишася беззакония,/ якоже предрече Господь:/ от соблазнов душегубца врага/ огради нас Богородице,/ и яко Родительница Всевышнего,/ вышнее заступление нам испроси.

 

Таже: Ныне отпущаеши: Трисвятое, по Отче наш:

Тропарь, глас 7:

Нищету Христову возлюбивши,/ небесныя трапезы ныне наслаждаешися,/ безумием мнимым, безумие мiра обличивши,/ смирением крестным силу Божию восприяла еси,/ сего ради дар чудодейственныя помощи стяжавшая,/ Ксение блаженная,/ моли Христа Бога/ избавтися нм от всякого зла покаянием.

Ин тропарь, глас 6:

Мудрость высшую соуза брачного разумевая,/ раба Божия Ксение,/ боговенчанный брак уцеломудрила еси,/ тем плоды покаяния возрастила еси,/ блаженство о Христе яко талант преумножив,/  заимодавцу Благому возврати,/ тойже богатством чудес тя одари,/ недуги целити и души спасати поминающих тя.

Ин тропарь, глас 4:

Суеты земнаго мiра отвергшися,/ крест жития бездомнаго во странничестве прияла еси,/ скорбей, лишений, людскаго осмеяния не убоялася еси,/ любовь же Христову познала еси,/  еюже ныне на небеси услаждаешися,/ Ксение блаженная богомудрая,/ молися о спасении душ наших.

Ин тропарь, глас 8:

Тебе, о странице, яви Христос Господь молитвенницу теплую за род наш,/ в житии бо твоем страдания и скорби восприявши,/ Богу же и человеком любовию послуживши,/ дерзновение велие стяжала еси./ Темже  к тебе в напастех  скорбех усердно прибегаем,/ из глубины сердец наших взывающе:/ пования нашего не посрами, Ксение блаженная.

Ектения сугубая малая и отпуст.

На велицей вечерни

Поем: Блажен муж: 1-й антифон. На Господи воззвах: стихиры на 8, глас 8.

Подобен: О преславнаго чудесе:

О Ксение блаженная,/ Небесное Отечествие возлюбивши/ на земли воистину странна пребыла еси,/ яко на стране чуждей преходящи./ Ныне убо в дому Отца Небеснаго водворяющися/ и странствия Владычня в чертозех горних наслаждающися, не забуди нас, память твою верно творящих,/ и от бед многоразличных нас избавляй,/ пред престолом Господа Славы нас поминающи.

О Ксение славная,/ яко мудрая дева/ в полунощи жития твоего жениху Христу в сретение изшла еси,/ светильник пламенеющий любве Божия носящи,/ юрода от мiра нарицающися,/ премiрныя же мудрости исполняющися./ Темже от милости елея, егоже богатно стяжала еси,/ подаждь нам, память твою верно творящим,/ капли того точащи на язвы наша.

О Ксение мужемудренная,/ крепость души твоея кто исповесть;/ яко на брань со князем тьмы и мiра сего исходящи,/ Андреем нареклася еси,/ ничтоже бо устраши тя или стужи ти:/ глад же и хлад и наготу терпящи,/ вся могу о Христе, мене укрепляющем,/ со апостолом взывала еси./ Темже и венча тя Христос подвигоположник.

Ины стихиры, глас 2.

Андрею Христа ради юродивому поревновала еси,/ нищету вольную избравши,/ и вся благая мiра сего презрела еси, блаженная,/ премiрная же благая обретши,/ раздаеши дары туне сих требующим/  и твоего заступления просящим.

Пророков еси сопричастница, о Ксение,/ яко градущая духом прозревала еси,/ преподобным же сожительница являешися,/ жестокому житию тех последовавши,/ и безмездным врачем ревнуеши,/ исцеления недужным доныне туне подающи.

Что тя наречем, о Ксение блаженная,/ кия ти песни принесем;/ яко в житии земнем чести мiрския бегавши,/ небесную славу наследила еси,/ темже ныне от всех  прославляема,/ не презри и наша хваления усердная.

Духа Святаго теплотою согреваема,/ благодатию Того, яко боготканною одеждою, облеченная,/ наготу  хлад претерпевала еси мужемудренно,/ глад же духовный словом Божиим утоляющи,/ о пище телесней небрегла еси,/ от силы в силу духом восходящи:/ темже и блаженство праведных наследила еси.

Вдовица честная от юности обретшися,/ дщери Фануилеве поревновала еси,/ храму Божию приметающися,/ постом же и молитвою Богу деннонощно служащи./ Темже и сподобилася еси зрети Христа Спаса,/ не на руку Симеоню носима,/ но во славе присносущней,/ на престоле превознесенном на небеси возседающа.

Слава, глас 3:

Се ныне Ксения блаженная/ на праздник свой нас собирает,/ церковным гласом зовущи:/ о чада и друзи, вскую любите суету и ищете лжи; что всуе мятетеся;/ видите мя, вся яко уметы вменившую/ и свободу от всякия тщеты улучившую:/ последуйте убо мне якоже и аз Христу,/ и к богатству,  аще течет, не прилагайте сердца,/ яко да времени пришедшу со мною водворитеся/ в чертозех радости нескончаемыя.

И ныне: Богородичен догматик, глас тойже:

Како  не дивимся:

Вход. Прокимен дне, и чтения 3.

Премудрости Соломоновы чтение

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение, они же суть в мире. Ибо пред лицем человеческим,  аще и муку приимут, упование их безсмертия исполнено, и вмале наказани бывше, великими благодетельствовани будут, яко Бог искуси я, и обрете их достойны себе. Яко злато в горниле искуси их, и яко всеплодие жертвенное прият я. И во время посещения их возияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань уразумеют истину, и вернии в любви пребудут Ему, яко благодать и милость в преподобных Его и посещение во избранных Его.

Премудрости Соломоновы чтение

Праведницы во веки живут, и в Господе мзда их, и попечение их у Вышняго: сего ради приимут Царствие благолепия, и венец доброты от руки Господни, зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. По’йдут праволучныя стрелы молниины, и яко яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы, и яко ви’хор развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте: навыкните, судии’ концев земли. Внушите, держащии множества и гордящии о народех языков: яко дана есть от Господа держава вам и сила от Вышняго.

Премудрости Соломоновы чтение

Праведник  аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник преставлен бысть. Восхище’н бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: угодна бо бе Господеви душа его, сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.

На литии стихира храма. Таже блаженныя, глас 8.

Страннице блаженная,/ свя суетная яко уметы вменившая,/ да бисер Христа приобрящеши,/ зрим тя, стогны града Петрова преходящую/ болезненными стопами оныя освятившую,/ мраза не страшащуюся, нощию сне града таящуюся./ Тамо колена души и тела преклоньши,/ о, коль теплы мольбы Богу ты сказала еси,/ паки же радостно поношений сама поискала еси,/ в злостраданиях Христа ради юродствовавшая,/ прозрения же дара тайно  сподобльшаяся,/ благодетельнице людем чудодетельная,/ Ксение святая,/ буд молебница присно за ны.

Слава, глас 4:

По имени твоему, Ксение, и житие твое:/ была бое си миру сему яко странная,/ веку сему яко чуждая,/ Церкви же святей яко присная./ На земли пребыла еси яко гостия привременная,/ на небеси же пребываеши яко жительница вечная./ Тамо еси яко Божия избранница,/ мы же н земли ублажаем тя яко нашу молитвенницу.

И ныне Богородичен, глас тойже:

Богородице, грешных Споручнице, не остави нас погибающих,/ но ризою заступления Твоего покрый нас,/ яко да ризы тоя край верою удержавше,/ из глубины падений изведени будем,/ милосердие Твое прославляющее.

На стиховне стихиры, глас 1:

Поспешай на помощь нашу, о Ксение  праведная,/ яко вси есмы в бедах,/ веры несумненныя не стяжавше,/ дерзновения же в молитвах не имущее./ Темже к тебе, блаженная, прибегаем:/ ты убо немощь нашу восполни,/ Христа Бога о нас умоляющи.

Стих: Господь хранит пришельцы, сира и вдову приимет.

Проречения твоя, блаженная,/ истину сокровенную провещаваху:/ темже велением твоим верою последующии,/ радость и от бед избавление улучаху./ Обаче тем противляющиися,\ горькия печали причастницы бываху,/ ничтоже пользующееся.

Стих: Господь возводит низверженныя, Господь любит праведники.

Воистину Ксение,/ по имени твоему и житие твое бысть,/ на небес ибо духом живущи,/ на земли странна явилася еси,/ града зде пребывающаго не имущи,/ но грядущаго взыскующи,/ в немже ныне водворяешися.

Слава, глас 7:

Новый Андрей, юродства подвиг волею на себе вземший,/ являешися, о Ксение, Андреем нарекшаяся:/ темже и видения премiрных, яко той сподобляющися,/ отверзеши очи суетою омраченным/ и предстательствуеши о всех, тебе ради милости у Христа Спаса просящих,/ Егоже моли, блаженная,\ спастися душам нашим.

И ныне, Богородичен, глас тойже: Под кров Твой:

Тропарь, зри на малой вечерни. 

На утрени

На Бог Господь, тропарь дважды.

Слава, и ныне: Богородичен, глас тойже.

По 1-й кафизме седален, глас 1:

Не ктому же озлобления и скорби претерпеваеши, блаженная, на земли чуждей  странствующи, но во Отечествии небеснем водворяешися и тамо с лики праведных утешаешися. Темже и нас, непрестанно тебе призывающих, от бед и напастей многообразных присно избавляй.

Слава, и ныне: Богородичен, глас тойже:

Богородице, Дево, радуйся, радость от ангела приявшая и радость мiру принесшая, радуйся, рождшая Зиждителя Твоего и Господа. Радуйся, сподобльшаяся быти Мати Божия.

По 2-й кафизме седален, глас 8:

Тебе, блаженная, от Бога дадеся благодать пещися о людех, недужныя целити и скорбныя утешати, обуреваемыя напастьми ко пристанищу благоутишному направляти, заблудшия и отчаянныя  на путь спасения направляти. Темже мы ныне, пмять твою совершающее, тепле зовем: не забуди нас, блаженная, в твоих дерзновенных молитвах.

Слава, и ныне: Богородичен, глас тойже:

Тебе, Владычице, едину надежду и прибежище имамы, Тебе стену нерушимую от всех враг и напастей стяжахом, не остави нас ныне и присно и во веки.

Полиелей и величание:

Ублажаем тя, святая блаженная Ксение, и чтим святую память твою, ты бо молиши за нас Христа Бога нашего.

Псалом избранный:

Терпя потерпех Господа, и внят ми и услыша молитву мою.

По полиелеи седален, глас 5:

Отверзи уста наша, Спасе, даждь слово разума рабом неключимым, воспети достойно Ксению блаженную, тоя бо подвизи мiрский разум превосходят, и тоя смирение, яко покров, житие ея сокрывает. Обаче чудесы и предстательством тоя просвещаеми, от любве сердечныя непрестанно зовем: не остави нас заступлением твоим, Ксение премудрая.

Слава, и ныне: Богородичен, глас тойже:

Не мудростию и силою, не богатством хвалимся, но Тобою, пренепорочная, Ты бо род человечь на высоту ангел превосходящую вознесла еси, Слово предвечное рождши, и матернее дерзновение к Сыну Твоему и Богу стяжавши. Темже Ти припадающе, молися: на забуди нас сирых, о всепетая Мати и Дево.

Степенна, 1-й антифон, 4-го гласа. Прокимен, глас 4-й:

Возвеселится праведник о Господе и уповает на Него.

Стих: Услыши, Боже, глас мой, внегда молити ми ся  Тебе.

Всякое дыхание: Евангелие от Матфея, зач. 43. По 50-м псалме стихира, глас 6:

Жестокое житие волею избрала еси, и озлобления всяческая претерпела еси, юродство мiра сего обличивши, премудрость же Божию явивши, и ныне на небеси утешаешися, мы же, на земли странствующе, тебе непрестанно зовем: не забуди нас, блаженная, Христа Бога о нас умоляющи.

Канон молебный Богородицы с ирмосом на 6, и блаженней Ксении на 8, глас 4-й, егоже краегранесие: Ксению мужеумную похвалами почитаем.

Песнь 1

Ирмос: Тристаты крепкия, Рождейся от Девы, безстрастия во глубине, души тричастное потопи, молюся, да Тебе, яко в тимпане, во умерщвлении телесе победное воспою пение.

Ксение блаженная, воистину по имени твоему и житие твое бысть, на земли бо, яко во стране чуждей, преходящи и во Отечествие небесное преставитися чающи, вся земная, яко сень и соние, презрела еси.

Суету всяческую, яко прах от ногу твоею отрясши, жестоким путем в землю обетования шествовати изволила еси, Ксение мужемудренная, человекоубийцу врага, яко амалика, побеждающи и Господеви победное пение приносящи.

Египетские котлы благоденствия презревши и мiру кичливому посмеявшися, Ксение мудрая, моря житейского дно прешла еси неврежденно, Богу тя ведущу рукою крепкою, Емуже воспела еси победное пение.

Богородичен: Ненадеющихся надеждо и боримых помоще, Пречистая, в мори сущих звездо боготечная, и в пустыни заблуждших источниче живоносный, отраду душам нашим, Дево благословенная, даждь.

Катавасия: Отверзу уста моя:

Песнь 3

Ирмос: Не мудростию, и силою, и богатством хвалимся, но Тобою, Отчею Ипостасною Мудростию, Христе: несть бо свят паче Тебе, Человеколюбче.

Иоанна, возлюбленнаго ученика Спасова, слышавши глаголюща: иже любит мiр, в нем любви Отчей несть, мiр грехолюбивый возненавидевши, в дом Отчий поспешала еси, блаженная.

Юроду себе Христа ради сотворши, мудрости же премiрныя исполняющися, оком чистым будущая, яко настоящая, прозревающи, пророком Божиим поревновала еси, Ксение богомудрая.

Молитва усердная пища тебе бысть, праведнице: ругания же и осмеяния, питие сладкое: смиренномудрие, одежда украшения: и венец, Духа осияние.

Богородичен: Уста двизати на молитву, якоже мати Самуилова никакоже обленимся, вернии, небесе и земли Царицу призывающи.

Седален, глас 5-й:

Егда нощию молитвы твоя тайнолепно творящи, на снег колена твоя преклоняла еси, блаженная, душа твоя паче снега убеляшеся, слезы же, от теплоты сердечныя проливаемыя, землю согреваху, град твой спящий бдением твоим спасашеся, и гнев Божий от того отвращашеся. Ныне убо тебе от мiра сего отшедшей, бедствуем люте, нощь несветла наста нам, огусте тьма греховная, сон лености и нерадения зеницы наша смежи, град твой в руце безбожник предадеся, и Отечествие твое врагу поработися, потщися убо на молитву и на помощь нам поспешай, Ксение, дерзновением велия.

Слава, и ныне: Богородичен, глас тойже:

 Предстательнице и скорая Заступнице рода христианского, бездомных и отечествия лишенных Покровительнице, моли присно Сына Твоего и Бога с блаженною Ксениею за русския люди во Отечествии и в разсеянии сущия, да Отечествия неотъемлемаго, небеснаго достигнем.

Песнь 4

Ирмос: Услышах славное смотрение Твое, Христе Боже, яко родился еси от Девы, да от лести избавиши зовущия: слава силе Твоей, Господи.

Женскую  немощь отлагающи, Андреем нареклася еси, мужеумная, противу духов злобы подвизающися, слава силе Твоей, к подающему ти силу взывающи.

Евино высокоумие, рай затворившее, отвергши всеконечно, богомудрая, юрода нарещися изволяеши, змия льстиваго посрамивши.

Ум Христов внутрьуду таящи, премудрая, мiра мудрость попираеши, вразумляеши же люди, судьбы Божия предвозвещающи, и стопы наша на путь правый направляющи.

Богородичен: Милосердие Твое к нам преклонити тщимся, Богородице, молитвенницу Тебе предлагающи Ксению блаженную, еяже предстательство стяжати уповаем, память ея тепле воспевающе.

Песнь 5

Ирмос: Стяжавый ны, избранныя люди, Кровию Твоею, Господи, Твой мир даждь нам, во единомыслии сохраняя стадо Твое.

Наготу и хлад терпящи, ризы же нищим раздающи, довлеет ми риза крещения, в себе взывала еси, блаженная.

Уврачуй наша раны, услыши молитвы, умири нашу жизнь и на помощь нам поспешай, Ксение боголюбивая.

Юныя вразуми и на путь истины настави, старыя умудри и божественная разумети научи, всяко на дела благая их подвизающи, о Ксение, удрость небесную стяжавшая.

Богородичен: Печали отложше, восклонимся и горе воззрим, братие, и узрим в небесех Царицу Богородицу, покровом своим светоносным нас покрывающую.

Песнь 6

Ирмос: Внегда скорбети ми, возопих ко Господу, и услыша мя Бог спасения моего.

Окорми нас, в мори житейском бедствующих, блаженная, ко пристанищу благоотишному нас провождающи, молящися ко Единому, иже нас спасти могущему.

Хотяще благая творити, злая содеваем. Заповеди Божия ведуще, о тех небрежем и согрешаем: помози нам немощным, Ксение благосердая.

Возопи о нас ко Господу, Емуже послужила еси, о Ксение, гласом крепким, якоже Моисей в пустыни, и услышит тя Бог, спасти хотяй человеки.

Богородичен: Аще не ты нам руце простреши, о Богомати, не имамы избыти погибельнаго рова, сего ради Ти зовем: Владычице, спаси ны.

Кондак, глас 3:

Днесь светло ликует град святаго Петра,/ яко множество скорбящих обретают утешение,/ на твоя молитвы надеющися,/ Ксение всеблаженная,/ ты бо еси граду сему похвало и утверждение.

 Ин  кондак, глас 3:

На земли яко странна пребывши, о небеснем же Отечествии воздыхающи, юрода от буиих и неверных, премудра же и свята от верных познаваешися, и от Бога славою и честию венчаешися, Ксение мужеумная и богоумная, сего ради зовем ти: радуйся, яко по странствии земнем  в дому Отчем водворяешися.

Икос:

Кто сия, во врата Царствия Небеснаго толкущая, еяже ризы белы, лице же сияет паче солнца; откуду приходит и яковых требует; сия есть дщи Отца Небеснаго, Сына Божия раба  верная и Духа Святаго сосуд избранный, на земли яко странница пришельствовавшая. Ныне во Отечествие небеснее преставляется, со тщанием убо сей двери отверзите и сретайте ю, с веселием зовуще: радуйся, Ксение, яко по странствии земнем в дому Отчем водворяешися.

Песнь 7

Ирмос: Юноши три в Вавилоне, веселие мучителево на буйство преложше, посреде пламене вопияху: благословен еси Господи, Боже отец наших.

Легкое бремя Христово на рамо твое вземши, вся тяжкая земная ни во чтоже вменяющи, блаженная, неудобоносимое камение на верх церковный преносила еси, усердно трудящися и зовущи: благословен еси Господи, Боже отец наших.

Алчем и жаждем и наготуем духовно: пищу сладкую, твое наставление, даждь убо нам, блаженная, прохлади гортани наша росою молитв твоих о нас, убогих, яко да Господеви благодарне зовем: благословен еси, Боже отец наших.

Мытарево грехолюбное житие подражающе, смиренномудрия того не стяжахом, паче же и фарисеевой гордости предахомся, добродетелей же не имуще, что убо сотворим немощнии, аще не к тебе, Ксение, прибегнем и возопиим: умоли о нас Бога отец наших.

Богородичен: Иныя несть во вселенней, якоже Ты, Богородице, яже матернее дерзновение ко Спасу имущая, и ангелы преславною чистотою превозшедшая: темже Ти припадаеи, Владычице, моли о нас присно Бога отец наших.

Песнь 8

 Ирмос: Всяческая, Владыко, премудростию Твоею составил еси, земли же паки утвердил еси, якоже веси, дно, основанием водрузивый на вода безмерных. Тем вси вопием, воспевающе: благословите дела Господня непрестанно Господа.

Помощница нам буди, блаженная, изымающи нас от скорбей и болезней, от соблазнов же, нестроений и бед, и желания сердец наших во благо исполни, яко да о тебе Бога благодаряще, вопием: благословите дела Господня непрестанно Господа.

Огневицу державствующему уставила еси, царице же в видении соннем представши, прорекла еси той рождение чада, темже благодарственне вопияше: благословите дела Господня непрестанно Господа.

Чада твоя есмы, о Ксение блаженная, не остави нас сирых, но на помощь к нам прииди. Не забуди о славе твоей пекущихся, но радованием им воздаждь, да вси согласно поем: благословите дела Господня непрестанно Господа.

Богородичен: Имя Твое пресладкое и мироуханное да не отходит от уст наших, Богородице, сердца же наша любовию божественною горяща всю тварь да приглашают вопити: благословите дела Господня непрестанно Матерь Божию.

Песнь 9

Ирмос:  Тя, Преславную Невесту и Всесвятую Богородицу, Зиждителя рождшую, невидимых же и всех видимых, песньми величаем.

Тайнолепная жития твоего и подвизи твои сокровеннии, ныне мiру явишася, Ксение блаженная, темже о тебе всеселящеся, Христа Бога, тебе прославльшего, немолчно величаем.

Аще и преставилася еси от земных, обаче ведуща тя и по  смерти нам спребывающую и молитвами твоими присно нас от бед покрывающу, благодарне тя, блаженная, величаем.

Еже о нас немощных и убогих попечение твое воспоминающе, с любовию к тебе припадаем, молитвеннице наша крепкая: не остави убо нас сирых, но присно нам помогай, яко да о тебе Бога и Отца Небеснаго присно величаем.

Богородичен: Молитвы Ксении блаженныя к Тебе, Владычице, о нас приносимыя, к Сыну твоему и Богу, Дево, принеси, Твоим матерним ходатайством тыя подкрепляющи, и спасай, Пречистая, Тя величающая.

Светилен:

Доме Отчий, отверзи ми двери, от земли чуждей преставльшейся, вопиет Ксения блаженная, во врата Царствия Небеснаго толкущи.

Слава, и ныне: Богородичен:

Двере небесная, палато Царева, христиан нерушимая стено, богоприемнии Твои руце нам простирающи, введи нас, Владычице, в вечныя кровы.

На хвалитех стихиры на 4, глас 8:

Солнца правды Христа безумно уклонихомся, и зима нам есть лютая жестокосердия. Но ты, блаженная, теплотою молитв твоих оледеневшая сердца наша согревай, яко да от сна нечувствия восклонимся, весну духовную возвещающи.

В нощи греховней заблудихомся, огусте тьма духовная: како избегнем падений и погибельнаго рова; како обретем путь ко спасению; ты, блаженная, светильник милосердия твоего возжегши, изыди в сретение нас погибающих и, простерши нам руце твои, на стези правыя изведи ны.

Где премудр, где книжник, где совопросник века сего; не обуи ли Бог премудрость мiрскую; темже и ты, Ксение, мiру юрода являешися, Христа, Божию премудрость проповедающи, и Того благодатию просвещаема, всех научаеши суеты мирския отгребатися.

Нищету совершенную стяжавши, премудрая, мiрския мудрования отвергши, Богу же яко вдовичу лепту в жертву разум принесши, юрода человеком являешися, обаче тя вемы мудрейшую премудрых, темже от тебе научения просим: просвети наш ум твоею светлостию, мрак неведения отгоняющи.

Слава, глас 6:

Все отложивши мiрское попечение, ризою юродства премудрость сокрывающи, Богу же и человеком тайнолепно послуживши, стяжала еси Святаго Духа благодать, о Ксение блаженная, темже яко дерзновение ко Спасу имущая, не престай молити Того спастися душам нашим.

И ныне,  Богородичен, глас тойже:

Вся превозшедши непорочнаго девства добротою, Бога родила еси неизреченно, пресвятая Дево Мати, тем же род человечь о Тебе радуется, и Тобою, истинною Богородицею, дерзновенно хвалится, на Тя упование возлагая, Ты бо еси предстательница и спасение мiру.

Славословии великое. Ектении и отпуст.

На литургии

Блаженны, от канона блаженныя песнь 3 и 6.

Прокимен, глас 4: Дивен Бог во святых Своих, Бог Израилев.

Стих: В церквах благословите Бога, Господа от источник Израилевых.

К Галатом послания святаго апостола Павла чтение, зач. 213

Аллилуйя, глас 1: Терпя потерпех Господа и внят ми, и услыша молитву мою.

Стих: Постави на камени нозе мои и исправи стопы моя.

Евангелие от Луки, зач. 24

Причастен: В память вечную будет праведник, от слуха зла не убоится.


Советы приходящим в храм

Наш адрес

140130, Московская обл., Раменский г.о., д.п.Кратово, ул.Нижегородская, д. 17

тел. (495) 556-10-43,

(925) 654-19-11

Схема проезда

Поиск по сайту

Наш баннер