(память 19 декабря ст.ст.)
На Господи воззвах
стихир 8, глас 4:
Из глубины воззвах к Тебе, Господи:
Аще не бы Господь был в нас, /Глаголет боговдохновенный пророк,/Совратилися бы вкупе пути истинна, /
Сего ради некогда младей о вере Руси /Яко от небес посылаются Промыслом /Доблестию духа изрядствующии подвижники /От нихже единаго сподоби, Спасе, возславити /
Приснодарствуяй тому во бранех победу./
Да будут уши Твои:
От предел древля славою Мурома/Подвижник долготерпения является /Илия, Божественный воистину жребий,/На служение избран изрядное,/Да подаст христолюбиву воинству крепость/Несокрушимо мужество и на враги победу./
Аще беззакония назриши, Господи:
Яко раб благоговеин Господу, князю же опора,/
Собратии мудрый стратиг, народу заступник милостивый,/
Показался еси, Илие, о поборниче правды,/
Яко новое солнце, добродетельми сияяй всем,/
Супостаты убо пожигаяй яростию /
Ходатайствуя от небес на тех победу./
Имене ради Твоего:
Во дворех князя благоверна/
Среде обстояния отвсюду поганых полков/
Мир со благоденствием учиняются,/
Яко чудну Илии со ратники его/
Самоотвержения крестным оружием/
Присноявляти верным на враги победу./
От стражи утренния:
Неколебима держава Русская,/
Во время оно преславна показуется,/
На недвижиме утверждена камени веры,/
Благодарение непрестанно возглашает Господу,/
Тобою, Илие, ограждена от дальних предел,/
С Константином Крест возносит, яко сим победа./
Яко у Господа милость:
Не могий нигде покоя обрести,/
Ни удовлетися, ниже радоватися,/
Враг исконный поганых копием/
Рану ти сердечную наносит, чудне Илие,/
Не могий коснутися в тебе веры живыя глубины,/
Приближая ти исходну духа победу.
Хвалите Господа вси языцы:
Ново поприще, обаче кратковременно,/
Отверзается ти, смиреннейше Илие:/
Сего бо сердцем ураненным возжелел еси,/
Еже воинству приобщитися Духа бойцов/
Сиречь полку иноческу, преподобными отцы ведому,/
Яснозрящими Христову надмiрну победу.
Яко утвердися милость Его на нас:
По имени и житие твое, Илие достохвальне,/
Се воистину, яко крепость Господня,/
показался еси о всех:/
Юностию, терпеливодушною верою утвержденною,/
Еще зрелостию, бранными увенчанною подвиги,/
Паки мирным исходом к премiрным Божия инока,/
Се земная слава твоя, се небесна победа.
Слава, глас 2, самогласен, подобен «Егда от древа»:
Се во веки память твоя, святе Илие:/
Яко народу любезен ти образ славным сказанием,/
Яко и шары печатлеется добрая сила твоя,/
Яко и перву аероплану русскому/
твоим именем нарицатися./
И от древних благодарною осиян любовию,/
Се и ново христолюбиво воинство молитвою укрепляеши,/
Пастырска служения тому, о вдохновителю,/
О пренадежное державы ограждение,/
Благослови победами новыя чудо-богатыри.
И ныне, глас 6: Вертепе, благоукрасися…
Вход и прокимен дне:
Чтения 3:
Судей Исраилевых чтение:
Прииде Ангел Господень, и седе под дубом, иже есть во Ефрафе, иже бысть Иоаса отца Езри. И Гедеон сын его млачаше пшеницу на гумне его, бежати от лица Мадиамля. И явися ему Ангел Господень и рече къ нему: Господь с тобою, сильный крепостию. И рече к нему Гедеон: во мне, господи мой: и аще есть Господь с нами, и вскую обретоша ны вся злая сия? и где суть вся чудеса Его, елика поведаша нам отцы наши, глаголюще: не из Египта ли изведе нас Господь? И ныне отверже нас Господь и предаде нас в руку Мадиамлю. И воззре на него Ангел Господень и рече ему: иди в крепости твоей сей, и спасеши Израиля от руки Мадиамли: и се, послах тя. И рече к нему Гедеон: во мне, господи, въ чесом спасу Израиля? Се, тысяща моя хуждша въ Манассии, и аз есмь мний в дому отца моего.
И рече к нему Господь: понеже Аз буду съ тобою, и избиеши Мадиама, яко мужа единаго.
И рече к нему Гедеон: и аще обретохъ благодать пред очима твоима, и да сотвориши мне днесь знамение, яко ты глаголеши со мною: не отиди отсюду, дондеже приити мне къ тебе, и принесу жертву мою, и пожру предъ тобою. И рече: аз есмь, премедлю, дондеже обратишися ты. И Гедеон вниде, и сотвори козлище от коз, и четверть ифи муки опресноков, и мяса вложи в кошницу, и юху влия в горнец: и изнесе к нему под дуб, и поклонися. И рече к нему Ангел Господень: возми мяса и хлебы пресныя, и положи у камене онаго, и юху близ излий. И сотвори тако.
И простре Ангел Господень конец жезла, иже в руце его, и прикоснуся мясом и хлебомъ пресным: и возгореся огнь из камене, и пояде мяса и опресноки: и Ангел Господень отиде от очей его. И виде Гедеон, яко Ангел есть Господень, и рече Гедеон: увы мне, Господи, Господи, яко видех Ангела Господня лицем к лицу.
Судей Исраилевых чтение.
Пойде Сампсон, и ят триста лисиц, и взя свещи, и связа ошиб ко ошибу, и устрои едину свещу между двема ошибома: и разжже огнь в свещах, и пусти я в нивы филистимски: и запали нивы от гумен и даже до класов простых и до винограда и масличия. И рекоша иноплеменницы: кто сотвори сия? И рекоша: Сампсон зять Фамнафеев, яко взя жену его и даде ю единому от другов его. И взыдоша иноплеменницы и сожгоша ю и дом отца ея огнем. И рече им Сампсон: аще и сотвористе вы тако ей, аз не благоизволю, но отмщение мое единому комуждо вас сотворю, и посемъ почию. И порази их голени до бедр язвою велиею: и сниде, и вселися у водотечи в пещере камене итама. И изыдоша филистимляне, и ополчишася во Иуде, и разсеяшася в лехи. И рече им всяк муж Иудин: почто приидосте на ны? И рекоша иноплеменницы: связати Сампсона приидохом и сотворити ему, якоже сотвори нам. И снидоша три тысящи мужей от Иуды к пещере камене Итама и рекоша к Сампсону: не веси ли, яко владеют нами филистимляне? и вскую сия сотворил еси нам? И рече им Сампсон: якоже ми сотвориша, тако сотворих им. И рекоша ему: связати тебе приидохомъ и предати тя в руце иноплеменником. И рече им Сампсон: кленитеся мне, да не убиете мене вы. И рекоша ему, глаголюще: ни, но токмо соузом свяжем тя и предадим тя в руки их, смертию же не умертвим тебе. И связаша его двема ужы новыми и изведоша его от камене того. И той прииде до челюсти: иноплеменницы же воскликнуша и текоша противу ему. И сниде на него Дух Господень, и быша ужя на мышцахъ его яко изгребие, егда зажжется огнем: и разрешишася узы его от руку его: и обрете челюсть ослю повержену, и простре руку свою, и взя ю: и изби ею тысящу мужей. И рече Сампсон: челюстию ослею потребляя потребих их, яко челюстию ослею избих тысящу мужей.
Премудрости Соломони чтение.
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И в мале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их: и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему. Яко благодать и милость в преподобных Его, и посещение во избранных Его.
На литии, гл.8:
Не изнемогая, не разжизаяся,/
Апостольски, Илие, одолевал еси/
От немощи ти боговместимыя/
Недуги телесныя, духа томление -/
Да ясноявиши образ евангельский//
Крепчайша терпения до конца./
В путных шествиих множицею,/
Апостольски, Илие, премогал еси,/
Еже во бранех не в меру лишения,/
Душею подвизаяся, духом бодрствуя,/
Да, яко воинства христианскаго стратиг,//
Образ даси верным мужества край.
Слава, глас тойже:
Ограждая присно богоданный ти народ/
Нецелимую рану сердечную/
Мученически, о Илие, под’ял еси,/
До креста смиряяся иноческа,/
На венец благословенна ко Господу пути,//
Похвалу ти от нас печатлеюща.
И ныне, глас тойже:
Явлением пречудных образов Твоих/
Апостольски, Дево Пречистая, обтекла еси/
Грады и страны христианския,/
Ныне же молитвами славна Илии и всех Печерских отец/
Землю Русскую благословляеши -//
Во Успении не оставльшая мир.
На стиховне:
глас 2, подобен «Доме Евфрафов»:
Земле Муромская,/
Образы в веках прославленная/
Святости семьи христианския -/
Славою сияй первоначальною//
Илии, духовна воина.
Честна пред Господем/ смерть преподобных Его:
Градов российских мати,/
Божия архистратига доме,/
Веры славь защитника,/
Крепость ти Господню,//
Илию духовна воина.
Что воздам Господеви/ о всех, яже воздаде ми:
Соборе богоносных отец,/
Злато Лавры Киево-Печерския,/
Окрест вся осиявающее,/
Возблистай талантом днесь//
Илии духовна воина
Слава, глас и подобен тойже:
Новый доме Евфрафов,/
Уделе избранный -/
Русь Святая -/
Храни веру православную,//
В нейже тебе утверждение.
И ныне, гл.8, подобен «О преславнаго чудесе»:
О преславнаго чудесе: Небеси и земли Царица…
Тропарь, глас 4
Новый Сампсон Русстей является земли:/
От терпения велия стяжевает богоизбрание,/
Дерзновением умножает богоданную силу,/
Сокрушает множицею поганых полки,/
Иноческа совершенна венца сподобляется/
Илия, Муромская похвала,//
Молитвенник о душах наших.
Тропарь, глас 3:
Ликовствует днесь земля Русская,/ воина и чудотворца своего Илию Муромца прославляюще,/яко той в Церкви торжествующей пребывая,/соратует сродницем своим и Церкве воинствующей,/на враги видимыя и невидимыя/Руси Святой испрошая у Господа вспоможение,/да невозбранно славят и чтут людие русския// Христа Бога.
Тропарь, глас 4:
Приидите, вси вернии, / песньми духовными почтим / преподобнаго отца нашего Илию Муромскаго, / светильника обители Печерския и всея России великаго заступника, / образ подвига воинскаго и духовнаго нам показавшаго, / чудес благодатию ныне сияюща. / Темже притекающе к раце мощей его, / любовию целуем и вопием: / моли Христа Бога / сохранити Отечество наше // и даровати нам велию милость.
НА УТРЕНИ:
По 1-м стихословии седален, глас 6:
Божий трудниче и воине непобедиме Илие,/ малодушныя ны воздвигни, заступи немощныя.
Слава и ныне: Заступлением не остави, укрепи на борющия ны, вся бо возможна Тебе суть, Мати Дево.
По 2-м стихословии седален, глас 6:
Несть уныния нам, аще и немощию обложени есмы,/тя имущим, Илие преподобне, заступника.
Слава и ныне: Несть отчаяния верным, несть одоления от врагов, Божия Матере покров обретшим.
По полиелее седален, глас 6:
Сердцу Илии конечне уранену,/паче любовию уязвленну Божию,/отлагает стратиг бранныя подвиги,/яко князя велика служитель изрядный,/избирает, мудрее иноческое житие,/со святыми упокоение.
Слава и ныне: Не лиши ны Матерняго заступления в час Суда,/ милости да не лишимся во веки Божией,/со святыми упокоения.
Прокимен, глас 4:
Честна пред Господем/ смерть преподобных Его:
Стих: Что воздам Господеви/ о всех яже воздаде ми.
Евангелие от Матфеа, зачало 43
Стихира по Евангелии, глас 6:
Святым, иже суть на Руси Святей,/преподобным древним и новым мучеником,/удиви Господь хотение Свое,/еже Церковь Русскую возродити/дерзновенных сих ходатайством:/сего ради, о всей Руси умоляющу,/славному духовну воину Илие возопиим:/
радуйся, защитниче наш присный и молитвенниче.
Канон, глас 4,
егоже краегранесие:
ИЛИЮ ВОИНА ДУХОВНАГО ЛЮБОВИЮ ВОСПОИМ
Песнь 1
Ирмос: Мо́ря чермну́ю пучи́ну / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма / Амали́кову си́лу в пусты́ни победи́л есть.
Преподобне отче Илие, моли Бога о нас.
Иже вся творяй и претворяяй, Иже тя, Илие, поборника Си прозорливне избра, да и моей худости воспети подвиги твоя глагол дарует.
Преподобне отче Илие, моли Бога о нас.
Любезен народу Божию душеполаганием о том присным явлься, Илие, ныне сердца того благодарное приими.
Слава: Избрание твое, Илие, от младых ногтей боговместимою немощию печатлеется, да, яко сам искушен, возможеши и искушаемым помощи.
И ныне: Юже яко Богородицу блажим вернии, на Сию и упование возлагаем присно, яко земная Рождеством онебесившую.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище, и утвержде́ние.
Преподобне отче Илие, моли Бога о нас.
Верою благодушною яко от руки Спасовы болезнь приемлет кротостию Илия, сердце заповедьми Того утверждая присно.
Преподобне отче Илие, моли Бога о нас.
От юности терпение крайнее явил еси, да не от земных основание подвигом положиши, Илие, но о Господе Подвигоположнице.
Слава: Иже всякую добродетель яко сродную Себе зрит, Сей и немощное ти врачует, паче же преисполняет тя духа силою.
И ныне: Неневестная глас Архангелов приемлет Невеста, паки и утробы взыграние ненеплодныя, ныне же, яко Мати Царя, к Вифлеему тщится.
Седален, гл.2:
Немощным буди врач, Илие, подвизащимся наставник, духа бодростию укрепляя вся.
Слава и ныне: Немощным исцеление, подвизающихся крепость, всем скорбящим радость познахом Тя, Дево Богородице.
Песнь 4
Ирмос: Вознесе́на Тя ви́девши Це́рковь на Кресте́, / Со́лнце Пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди
Преподобне отче Илие, моли Бога о нас.
Адаманту крепкодушие подобится Илиино, сего ради воинствует той на супостаты изрядне, яко новый Сампсон богозванну народу являет ся.
Преподобне отче Илие, моли Бога о нас.
Добре сечет иноплеменники ослею челюстию назорей, добре Илия, сему подражая, враги сокрушает яко ратник Христов.
Слава: Украшен вельми доблестию, Илие, яко по всяческим во бранех искушен, в супостатех видимых исконнаго врага-человекоубийцу прозираеши, Божиим онаго сокрушая Духом.
И ныне: Храмины показуются Вифлеемстии, яко отнюд невместимы Царю всех, в нихже место вертеп Царице, яко красная палата готовится.
Песнь 5
Ирмос: Ты, Господи мой, Свет в мiр пришел еси, Свет Святый, обращаяй из мрачна неведения, верою воспевающия Тя.
Преподобне отче Илие, моли Бога о нас.
Огнепаляща пророка имени и благодати наследник быв, Илие, ревностию о народе Божии сему подобяся, паки и дерзновением на супостаты.
Преподобне отче Илие, моли Бога о нас.
Верою огнь с небеси призывая от Господа, закалает пророк Иезавелины, тако и новый Илия разит поганыя, небоязненным духом исполнь.
Слава: Не в вихре, не во огни и дусе явися пророку Господь, тако и тебе, Илие, яко чистоты рачителю, тонка хлада Иисусова глас открывается, яко иноку совершенну Божию.
И ныне: Ахаавово посрамляет безумие пророк, таже дерзость поганых сокрушает воин, да явится молитвенник неусыпающ Приснодевственныя.
Песнь 6
Ирмос: Пожру Ти со гласом хваления, Господи, Церковь вопиет Ти, от бесовския крове очищшися, ради милости от ребр Твоих истекшею кровию.
Преподобне отче Илие, моли Бога о нас.
Грады могущих покаряются, веси ограждаются русстии, мир вселяется Божий в сердца христиан тобою, Илие, о хвала Муромская.
Преподобне отче Илие, моли Бога о нас.
Оглашается воздух похвалами ти сугубыми, Илие, яко стратигу истинну, супостатом еси убо страх, верным же образ к подражанию известнейший.
Слава: Любовию оскудевше, любовию подвизаемся, Илие, тобою ограждаеми присно от видимых и невидимых враг, по образу твоему дерзающе от земли до небесных достигнути.
И ныне: Юница Божия ко яслем тщится, разрешением явити мiру спасение: Тельца упитанна, за всех закалаема.
Кондак, глас 6:
Илие терпеливейше, Илие богоизбранне, Илие о небесне воине: огради, защити ны, воздвигни духом, на борющия вооружи.
Кондак, глас 8:
Яко светило великое Российския земли, / Небеснаго Царя воевода непобедим явился еси, / и монашествующих богодухновенное украшение. / Ныне же со Ангелы Престолу Божию предстоя, / Владыку Христа, всех Творца, моли / избавитися от всяких бед и скорбей / чтущим святую память твою, да зовем ти: // радуйся, Илие, преподобне отче наш.
Икос:
Образу твоему, Илие, прелюбезну дивимся, подвигом твоим вдохновляемся и любовию зовем: огради, защити ны, воздвигни духом, на борющия вооружи.
Песнь 7
Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.
Преподобне отче Илие, моли Бога о нас.
Бренность жития открывается яве ти, досточудне Илие, раною нецелимою, сердце Божию любовию уязвляющею.
Преподобне отче Илие, моли Бога о нас.
От славы ти достодолжныя, обаче привременныя, устранитися тщишися, да стяжеши мир паче онаго, о немже воинствовал еси.
Слава: Вся ко спасению устрояющему, промышляющу премудре о всех, поет новый Илия инок: Боже, благословен еси.
И ныне: Идем до Вифлеема, с пастырьми, братие, да Спасение узрим, да восприимем небесный мир, иже с Богом Превечным.
Песнь 8
Ирмос: Руце распростер Даниил, львов зияния в рове затче; огненную же силу угасиша, добродетелию препоясавшеся, благочестия рачители, отроцы взывающе: благословите, вся дела Господня, Господа.
Преподобне отче Илие, моли Бога о нас.
Юность положивый, Илие, да терпение стяжеши, зрелостию послужил еси бранным князю велику подвигом, ныне ко мiроотшествию приближся, мир обрел еси, всяк ум преимущ.
Преподобне отче Илие, моли Бога о нас.
Во бранех слава твоя, Божий воине, в Книзе Жизни имя твое, во святых жребий твой, Илие преподобне.
Благословим: Образ буди нам, святе, терпеливодушия непостыдна, небоязненна духа, паче же смирения, вся от Бога ходатайствующа.
И ныне: Смущается Ирод лютостию, затворены домы Богови, паче сердца поют Христа пастырие и волсви и превозносят во вся веки.
Песнь 9
Ирмос: Камень нерукосечный от несекомыя горы Тебе, Дево, краеугольный отсечеся, Христос, совокупивый разстоящаяся естества, тем веселящеся, Тя, Богородице, величаем.
Преподобне отче Илие, моли Бога о нас.
Помолися о нас, Божий трудниче Илие, да твердостию храним заповеди, да послужим любовию, в Вифлеемских изволившу восклонитися яслех.
Преподобне отче Илие, моли Бога о нас.
Огради помышления нам, еже суетная презирати, твоим образом вдохновенным, о Илие, и хранимым молитвами.
Слава: Илие, крепосте Господня земли Русския, Илие, неусыпный нам страже, возбуди дух нам, еже дерзновением по Господе следовати.
И ныне: Мурома прозябение и матери градов украшение, яко райский цвет возносишися Матери Спаса всех, в Вифлеемских изволившу восклонитися яслех.
Светилен:
Светла воина и пресветла инока, тьмы борителя приснаго, воспоим, вернии, Муромца Илию.
Слава и ныне: Свет возсияти мiрови, славу в вышних явити, на земли спасение, Дева Пречистая в Вифлеем грядет.
На хвалитех, стихиры — 4, глас 5, подобен: «Радуйся»:
Хвалите Его на силах Его:
Радуйся, Илие, добропобедне стратиже,
Подражавый от Писания Ветха праведником:
Аврааму — верою жертвенною,
Моисею со Навином — дерзновенныя души бодростию,
Гедеону же — зрячим Промыслу вседоверием,
Силы богоданныя явлением Сампсону,
Псалмопевцу — веледушием крайним, Пламенноревностным духом — тезоименну ти пророку-девственнику.
Хвалите Его во гласе трубне:
Радуйся Илие, благодати наследниче
Мучеников совершенных доблестию:
Иже тя от святых печер сретоша во обителех небесных:
Зде Димитрий — мироточная града апостольска глава,
Зде Победоносец благороден Георгий,
Стратилаты зде Андрей со Феодором,
С ними Тирон со четыредесятьми севастийцы, Зде же и прелюбезныя со Глебом Борис.
Хвалите Его в тимпане и лице:
Радуйся Илие, похвала Муромская,
Радуйся, образ многолетна терпения,
Радуйся, непостыдна упования правило,
Радуйся, сосуде силы богоданныя,
Радуйся, разума духовна исполнение,
Радуйся, о людех душу полагавый,
Радуйся, причтенный преподобным отцем,
Радуйся, вселюбезне Илие, Господня крепосте.
Хвалите Его в кимвалех доброгласных:
Радуйся, воинов Руси первоначальниче,
Радуйся, страже родных ти пределов,
Радуйся, смирителю поганых дерзости,
Радуйся и паки радуйся, имя славное Илие,
Радуйся, полков русских вдохновение,
Радуйся, державы молитвенно ограждение,
Тобою дерзаем и тобою хвалимся,
Убо дерзновение милующее нас пред Господем яви.
Слава, глас 6:
Отче преподобне Илие, помяни нашу худость, не престай моляся о любящих тя, паки о воспевших твой любви ко Господу и народу Его подвиг.
И ныне, глас тойже:
Богородице, Ты еси лоза истинная, возрастившая нам Плод Живота, Тебе молимся: молися, Владычице, со святыми Русския земли, помиловатися душам нашим.
