XristosVoskrese

Богослужение

11 августа - Рождество святителя и чудотворца Николая. Служба праздника

 

svtNikolayChudotvoretsРадуйся, рождением своим родителей удививый;
Радуйся, силу душевную абие по рождестве явивый.

Акафист святителю Николаю

 

Долгое время на Руси праздновался день Рождества святителя и чудотворца Николая, архиепископа Мир Ликийских, едва ли не самого почитаемого нашим народом святого. Об этом празднике у нас имелись упоминания уже в XII-XIII-м веках. В Новгороде существовал даже монастырь, посвященный Рождеству Святителя. Но со времени Императрицы Екатерины Великой общецерковное празднование этого дня было отменено. Оно возвращается в нашу церковную жизнь только теперь. Святейший Патриарх Кирилл, митрополит Крутицкий и Коломенский Ювеналий в этот день совершают праздничные богослужения в обителях и храмах, посвященных святителю и чудотворцу Николаю.

В последних изданиях Богослужебных Миней под 29 июля/11 августа приводятся тропарь и кондак Рождеству святителя Николая и сообщается: «29 июля Восточная Церковь издревле празднует рождество Святителя и Чудотворца Николая». В Минее под этим же днем приводятся также тропарь и кондак перенесению Великорецкой иконы святителя Николая из Вятки в Москву. В Богослужебных указаниях Издательства Московской Патриархии на 2014 год под тем же числом читаем: «Рождество свт. Николая, архиеп. Мир Ликийских. Перенесение Великорецкой иконы свт. Николая из Вятки в Москву». В этот день празднуется также древнейшая Зарайская икона святителя Николая. Город Зарайск, ныне Московской области, торжественно встретил чудотворную икону святителя 29 июля 1225 года. Можайский образ святителя также был принесен на Русь в день его рождества. Великорецкая икона святителя Николая была обретена чудесным образом на реке Великой, в Вятской земле. Перенесение этой иконы, прославившейся многими чудесами, из Вятки в Москву совершилось по повелению Царя Иоанна Васильевича Грозного. Царь встретил икону, принесенную на Московскую землю, 29 июля 1555 года у Симонова монастыря. Один список с нее был поставлен в Успенском соборе Кремля, а другой - в приделе «Николы Великорецкого» Покровского храма (Собора Василия Блаженного).

Любовь нашего православного народа к великому чудотворцу - совершенно особая. В дни его памяти в мае и декабре храмы у нас всегда наполнены верующим народом, который празднует их не менее торжественно, чем двунадесятые праздники. Так же, как и память св. Иоанна Предтечи, память святителя Николая совершается в нашей Церкви еженедельно - по четвергам. Но в месяцеслове память св. Иоанна Предтечи совершается 7 раз в году, а святителя Николая - лишь 2 раза. Нет сомнения в том, что третий праздник в честь великого святителя и чудотворца, его Рождество (как и доныне празднуется день Рождества Иоанна Предтечи), будет с любовью праздноваться православным народом. Практически это сможет осуществляться, если наши приходы будут располагать текстом службы Рождества святителя Николая.

В нашей Церкви известны две службы празднику: новгородская XVII-го века и вятская XVIII-го. Они приводятся в исследовании Светланы Черкасовой «Русские службы Рождеству святителя Николая» http://www.voskres.ru/bogoslovie/tscherkasova.htm) . Вторая служба принадлежала некогда Вятскому кафедральному собору. С исправлением некоторых опечаток и неточностей предлагаем вашему вниманию текст этой службы, написанной с большой любовью к великому святителю и твердым упованием на его заступление.

Помнится, в знойное сухое лето 2010 года Господь всё не давал дождя, хотя просили об этом, молились святому пророку Илие - читали специальную молитву... И вот накануне Рождества святителя Николая, как только мы, отслужив малую вечерню с акафистом великому чудотворцу в нижней части нашего храма, в южном приделе в честь Рождества святителя Николая, стали подниматься в верхний храм, чтобы служить всенощное бдение празднику, хлынул первый ливень!

Нашему единому православному народу, к которому ныне пришла беда, который враг рода человеческого так стремится разделить, очень нужна помощь великого чудотворца. Наш народ един еще и в особом его почитании. И потому будем надеяться, что празднование его Рождества с благодарностью и упованием привлечет к нам новые и богатые его милости.

Святителю отче Николае, моли Бога о нас!

Протоиерей Николай Булгаков


Скачать службу Рождества святителя Николая: .pdf .docx

 


 

Месяца июля в 29-й день

Рождество великаго святителя и чудотворца Николая

НА МАЛОЙ ВЕЧЕРНИ

На Господи, воззвах: стихиры на 4, глас 1.

Подобен: Небесных чинов:

Ныне светло празднуем святителя и чудотворца Николая преславное рождество, от праведники бо возсия нам, от добляго Феофана и благочестивыя Нонны, великий светильник, святитель Христов, просвещает наши сердца и помышления.

Ныне, святителю Николае, душа твоя пребывает в горнем Иерусалиме со святыми ангельскими силами и во славе праведных, но свыше, святителю, и нас назирай, празднующих любовию день рождества твоего.

Ныне отечество твое, святителю, град Ликия светло празднует святое и славное рождество твое, и мы с ними купно веселящеся, вопием: ты еси, отче, похвала наша и утверждение.

Слава, глас 4:

Всечестное твое рождество, отче Николае, ангелов множество на небеси и человеческий род на земли честно ублажает, яко святитель Вышняго во святем рождестве твоем пронаречен еси, Того молити о нас не престай, молимся, яко на тя упование возлагаем, святителю Николае.

И ныне, Богородичен.

На стиховне стихиры, глас 2.

Подобен: Доме Евфрафов:

Днесь ныне, земнороднии, приимите чистоты рачителя, Духа Божественнаго приятелище, Ликиом славу и всем земным удобрение.

Стих: Праведник яко финикс процветет:

Приидите ныне, празднолюбцы, светло торжествуем в честнем рождестве великаго отца и таинника Христова.

Стих: Насаждени в дому Господни:

Приидите, сошедшеся с Давидом вкупе возопиим: днесь род правых благословляется, от праведных родителей святитель Вышняго нам раждается.

Слава, глас 4:

Всемiрная радость, от праведник возсия нам днесь рождество твое, святителю отче Николае, иже премногия ради твоея чистоты храм Божий одушевлен явился еси и во святителех предивен познаваешися, того молитвами, Христе Боже, мир мiрови низпосли и душам нашим велию милость.

И ныне, Богородичен.

Тропарь, глас 4:

Чудное и славное рождество твое, святителю Николае, Церковь днесь православных светло празднует, ибо стоянием ногу твоею яви тя Господь и провозвести быти светильника и учителя миряном, весь мiр обогащающа и просвещающа чудесы. Тем вопием ти: моли Христа Бога спастися душам нашим.

Тропарь, глас 2:

Днесь возсия нам, яко солнце, торжество твое, отче Николае, ибо в рождестве твоем дивным стоянием ног твоих ангелы возвеселил еси, и человеки удивил еси, противныя же устрашил еси, темже ныне и Христова Церковь украшается яко невеста, и высоким гласом вопиет весело: уяснися моя доброта прекрасно, приидите вернии, возвеселитеся и подъимите спасение ваше и душевное нетление, в бедах скораго помощника, в скорбех посетителя, в мори обуреваемых тихое пристанище, алчущих питателя, слепых вождя, нищих богатство, старцев жезл, юных наказателя и чистоты учителя, и вси притекающии с верою приемлют исцеление душам и телом.

Слава, и ныне, Богородичен:

Вся паче смысла, вся преславная Твоя Богородице таинства, чистоте запечатанной и девству храниму, Мати позналася еси неложна, Бога рождши Истиннаго, Того моли спастися душам нашим.

НА ВЕЛИЦЕЙ ВЕЧЕРНИ

На Господи, воззвах: стихиры, глас 2.

Подобен: Киими похвальными венцы:

Киими похвальными венцы венчаем святителя в чудеснем рождестве его; плотию бо в Мирех суща, духовно же всех достизающа, и всю вселенную озаряюща, иже чисте того любящим, всем предстателя и заступника, и всем скорбным утешителя, благочестия столпа, верным поборника, егоже ради шатания врагов Христос низложи, имеяй велию милость.

Киими песньми похвалим святителя в честнем рождестве его; нечестию противоборца и благочестию поборника, Церкве первостоятеля, великаго защитника и учителя, и теплаго пособника, злославныя посрамляюща, потребителя Ариева, егоже ради сего шатание Христос низложи, имеяй велию милость.

Киими духовными пении и песньми восхвалим святителя во славнем рождестве его, далече бо сущая провидяща и отстоящая яко близ суща, и в рождестве своем стоянием честных ног пророчествующа неложно, еже всей вселенней хотящи быти назирателя, и обидимым избавителя, царем окормителя, и связанным разрешителя, и от неправедныя смерти свободителя, и всем дарующа верным велию милость.

Слава, глас 6:

Святителем удобрение и отцем славу, источника чудес неисчерпаемаго и верным заступника великаго, сошедшеся, о празднолюбцы, цветы добродетелей вземше, песненными похвалами воспоим, глаголюще: радуйся, в Мирех Ликийских рожденный и всему мiру вожделенный, верным хранителю и наместниче честный и столпе непоколебимый. Радуйся, светильниче всесветлый, иже мирския концы просвещаяй чудесы. Радуйся, печальным Божественное радование и обидимым теплый поборниче. И ныне, всеблаженне Николае, не престай моляся Христу Богу о чтущих верою и любовию приснорадостную и всепразднественную память рождества твоего.

И ныне: Кто Тебе не ублажит:

Вход. Прокимен дне. Чтения святительския.

На литии стихиры, глас 2:

Отче Николае, аще и Мирская страна израсти тя, но мiр весь, иже тобою просвещенный, мирными благоухании и чудес множествы, взывает похвальными песньми, и спасшиися тобою неосуждени, с сущими в Мирех, и мы поюще вопием: моли спастися душам нашим.

глас 4:

Отче Николае, закона судьбами, яко сад при водах насажден бысть и в дому Божием преславно процвел еси, и всех верных чудесы предивными возвеселил еси, темже и ныне прииди, отче, посреде нас невидимо, и озари нас от Бога данною ти благодатию во светлем сем торжестве, в честнем твоем рождестве, богоносе Николае.

глас 8:

Доблестей твоих, преподобне отче, плоды просветил еси верных сердца чудесными блистании. Кто бо слыша о сем не удивится, яко во святем рождестве твоем стоянием ног твоих предивен и непреклонен явился еси, досточудне Николае. Темже и нас, поющих и хвалящих тя, присно избави от враг видимых и невидимых твоими к Богу молитвами и спаси души наша.

глас тойже:

На хвалу потекл еси Господню, Николае, во временней жизни, и Той тя прослави на небесней истинней жизни. Темже дерзновение стяжав к Нему, моли спасти души наша.

Слава, глас 6:

Днесь верных собори сошедшеся, воспоем вкупе согласно предивнаго отца святителя Николая торжество, зачатие бо его честно, и рождество его свято, и во младенчестве его дивная всем явишася, темже вопием ему: сосуде святоизбранный, столпе и утвержение Церкве, Царствия наследниче, не премолчи вопити о нас ко Господу.

И ныне, Богородичен: Творец и Избавитель мой:

На стиховне стихиры, глас 5.

Подобен: Радуйся, Живоносный Кресте:

Радуйся, явивыйся деннице пресветлая пребезначальнаго света Владыки, радуйся, заре тайнаго света, иерарше Христов Николае, предвари и подвигни пречистыя твоя молитвы о нас ко Господу, празднующих верою память рождества твоего, во еже избавити нас от всякия напасти и лютыя наша болезни исцелити. Отче, тебе бо заступника имамы и умильно с верою вопием ти: молися о нас Христу Богу даровати нам велию милость.

Стих: Праведник яко финикс процветет:

Радуйся, главо преосвященная и Богу вожделенная, и от праведных родителей якоже вторый Самуил в дар Богу возложенный, и явился еси честное добродетелей жилище, бодреное правило непорочнаго священства, пастырю добрый и пресветлый, превеликий светильниче, иже победоподобное носяй имя, требующих милостивно прошения исполнявши, приклонялся к молитвам молящихся. Граде спасенный и одушевленный, притекающим к тебе избавителю готовейший, всем верою поющим твое преславное рождество, даруй нам велию милость.

Стих: Насаждени в дому Господни:

Радуйся, честный грозде зрелаго плода, от праведники ныне явился еси яко пресветлая заря, и всем нам предивен познаваешися, отче Николае, честный уме, Троицы честный сосуде, столпе церковный, верным утешение, побеждаемым помощь, и ныне во светлем торжестве рождества твоего богоприятными твоими молитвами разори напастей и скорбей наших тьму, святителю Николае. Ты бо еси истинный и любезный пастырь и отец наш, и мы овцы пажити твоея, и в помощь тебе призываем, даруй нам велию милость.

Слава, глас 2:

Приидите, христоименитых людей собор и всех верных сословие, днесь ныне в лице ставше, светлым гласом возопиим: блажен еси Феофане, яко такову отроку быв родитель, хотящаго родити словом учения многих ко спасению. Блаженна ложесна твоя, Нонно, имиже носила еси, и красна сосца твоя, имиже воздоила еси хотящаго напитати душетленным гладом тающия. Блаженно отечество ваше, град Ликия, и вся окрестная его. Но помолимся вама блаженная, еже молити его о нас, да испросит у Христа мира мiрови и душам нашим велию милость.

И ныне, глас тойже: О, чудесе новаго:

 

НА УТРЕНИ

На Бог Господь: тропарь святаго. Слава и ныне, Богородичен воскресный.

По 1-м стихословии седален, глас 1.

Подобен: Гроб Твой:

В Мирех рождься, святителю, миром разумно духовным явися помазан, отче Николае, темже миры чудес твоих мiр облагоухал еси, миро приснотекущее проливая, иже мирными твоими благоухаемыми чудесы почитающих торжество твое и нас, раб твоих, обогати.

Слава и ныне, Богородичен:

Всем Творца, Бога же и Содетеля, Всенепорочная, Чистая, Духом Божественным в ложеснах заченши и тления кроме родила еси, Егоже славяще, Тя воспеваем, Дево, яко Палату Царя всех и мiру заступление.

По 2-ом стихословии седален, глас 8.

Подобен: Премудрости:

Источник чудес от Бога явился еси, мудре Николае, темже, отче, в рождестве твоем дивен явлься, всем бо верным источаеши спасения воды, от Бога благодать прием, темже дерзновение имея к Нему, моли о чтущих верою и любовию память рождества твоего, всеблаженне Николае.

Слава, и ныне, Богородичен:

В кал греховный впадох и нет мне постояния, люте погрузи мя буря согрешений, но яко рождши Слова Единаго, Человеколюбца, на мя, раба твоего, призри и избави всякаго греха, и страстей душетленных, и всякаго озлобления льстиваго врага, Богородице неискусомужная, моли Христа Бога грехов оставление подати ми, Тя бо имам надежду, раб Твой.

По полиелеи седален, глас 5.

Подобен: Собезначальное Слово:

Ныне, отче святителю Николае, отечество твое град Ликия светло радуется, и вся Вселенная день рождества твоего честно празднует. Темже и мы днесь, во храме твоем сошедшееся, вкупе с ними похвальная приносим ти, глаголюще: радуйся, отче Николае, всех покрове и заступление.

Слава, и ныне, Богородичен:

Неискусобрачная Невесто, Приснодево, со святители непрестанно восхваляем тя, яко Тобою нам величия сотвори Сын Твой и Бог Превечный от Отца, Иже в ложеснах Твоих вместитися изволивый, да от лести свободит род наш.

Степенна 1-й антифон 4-го гласа. Прокимен, глас 4: Праведник яко финикс процветет и яко кедр иже в Ливане умножится. Стих: Насаждени в дому Господни: Евангелие от Матфея, зачало 11.

По 50 псалме стихира, глас 6. Днесь верных собори сошедшеся: Писана на литии Слава.

Канон Пресвятой Богородицы со ирмосом на 6.

 Канон великому святителю

и вселенскому чудотворцу Николаю, глас 3.

Песнь 1

Ирмос: Дивно, славно творяй чудеса:

Дивен и славен еси, Господи, творяй чудеса, разделивый море, и воду из камене источивый жаждущим людем, напои убо, Блаже, и мене росою Твоея благодати, да возмогу воспети угодника Твоего преславное рождество.

Дивное и славное рождество твое, святе Николае, от любве душевныя хощу похвалити, но недоумением содержим, боюся трепеща, зане вем, яко не красна похвала во устех грешников. Но обаче, дерзая на благоутробие твое, славлю святое твое рождество.

Дивна воистину и славна, святителю, память рождества твоего, яко звезда утренняя посреде облак, и яко солнце сияя на Церковь Вышняго, и яко дуга на облацех славы, тако сияет хвала твоя на тверди церковней, отче Николае.

Дивнаго и преславнаго святителя на преславное рождество христоименитии стекшеся, усердно соберитеся и славу Господеви воздадите, яко дарова нам такова пастыря и учителя нелестна, и путеводителя, и от бед свободителя, еретиком же посрамителя.

Богородичен: Дивна и преестественна тайна рождества Твоего, Богородице, кий слух слыша не удивится Богорождению Твоему, яко во утробе Своей Создателя всех нетесно вместила еси, и паки Дева пребыла еси.

Песнь 3

Ирмос: Неплодная душе:

Неплодну имам душу аз окаянный, како тя могу похвалити, святителю; воистину ты, отче, плод благохвальный, душу мою плодоносну покажи, да возмогу воспети святое твое рождество.

Неплодна быста родители твоя по рождестве твоем, святителю Николае. Естеству убо поведающу, яко не могут другаго такого родити, добродетельми же яко Авраам плодна и верна быста, того ради и мзду о вере своей от Бога тебе прияста.

Неплодных чресл честное прозябение, святителю, слыша, кто не удивится, рождшуся бо тебе, святе, воистину дивная о тебе яви Господь, трем бо часом неуклонно тебе стоящу на земли, идеже хотяше омытися, чудне Николае.

Богородичен: Неплодных ложесн Рождение, Пресвятая Владычице, но рождши нам Христа, Плода Безсмертнаго, питающаго всяко создание и смотряющаго всю тварь, Богородительнице.

Седален, глас 5.

О блаженная версто и благословенное супружество прекраснаго душею Феофана и боголюбивыя Нонны, Божественным бо желанием совокуплени быста, и израстивша нам прекраснаго плода, чуднаго Николая, не токмо бо яко цвет шипка или крина при исхождении воды или стебло ливаново во дни жатвы, но истиннаго плода реку, отца сирым и вдовицам заступника, богатство нищим и болящим здравие и утешение, и сущим в богатстве окормление, старости подпор и юности обучителя, благочестия окормителя, еретиком же и бесом губителя. К немуже мы ныне возопиим: отче святителю Николае, моли спастися поющим тя.

Слава, и ныне, Богородичен:

Блаженна ложесна Твоя, Богородительнице Дево, яко ширши Небес явльшася, словом бо составльшаго тварь во утробе Своей безсеменно имела еси, и во объятиих Своих нетрудно носила еси, тем молим Тя, Всеблаженная, еже молити от Тебе рожденнаго Христа, Бога нашего, во еже спастися поющим Тя.

Песнь 4

Ирмос: Покрыла есть небеса:

Покрыла есть яко облак любы твоя и благодать твоя, юже имаши от Бога, святителю Николае, всех призывающих имя твое святое, всюду бо неоскудно подаваеши и коегождо прошения исполняеши. Прииди и ныне посреде нас невидимо и посети нас, озлобленных грехми, любовию празднующих пречестное твое рождество.

Празднуется и украшается рождеством твоим, святителю, яко монисты, Церковь Христова, и невестски светло одевается и красуется, веселяся и вопия радостно, глаголя: приидите и видите желаемаго мною небеснаго гражданина и служителя Христова, днесь рождшася от благоверны родители.

Память рождества твоего, отче святителю, всем человеком бысть веселие. Покрый нас, отче всечестне, призывающих тя с верою и празднующих честно торжество праздника твоего, святителю Николае.

Похваляему бо праведнику возвеселятся людие, якоже рече Писание. Днесь ныне мы грешнии, в рождестве твоем, отче Николае, радуемся и веселимся духовне, Христа славяще, Иже тебе таковую благодать даровавшаго, яко Того хваления исполнь земля.

Богородичен: Пресвятая Богоневесто, рождшая Христа, Правителя и Содетеля всем, немощствующую душу мою исцели и настави мя на деяния благая, да всегда славлю Тя Преблагословенную.

Песнь 5

Ирмос: На земли Невидимый явился еси:

На земли, отче святителю, явися верным твое святое рождество, воистину любезное торжество, якоже бо ливан в кадильнице или яко маслина износящи плод, тако нам память рождества твоего, отче милосерде Николае.

На земли днесь ныне, святителю, познан бысть и, яко от Бога познан был еси, прослави бо тя Господь в рождестве твоем, ибо стоянием честных ног твоих являя хотящее быти на тебе дарование.

На земли ныне Церковь православных веселится, святителю Николае, и ликует с чады своими в памяти рождества своего, милосерде, и вопия глаголет: уяснися ныне доброта прекрасно и никогдаже угаснет.

Богородичен: На землю во чрево Твое, Чистая, яко дождь на руно сниде Господь и Бог наш, и от Твоих пречистых девических кровей плоть прием и чудодействова, и пострада, и взыде на небеса, с Собою возвышая праотца.

Песнь 6

Ирмос: Глубина страстей воста на мя:

Глубина страстей воста на ны и буря противных ветров, но предвари нас, отче святителю, и разори сопротиволежащий на нас совет лукаваго, и лукавых человек стремления хвалящихся о злобе своей, спаси ны от них, милосерде Николае.

Глубине богатства Божия дивитися суть должно, дела же Божии славити зело есть лепо, памяти же святых чтити вельми есть полезно. Почтим убо и мы, братие, и возлюбим возлюбленнаго Богом святителя Николая, како во святем младенстве его дивная о нем показа Бог. Питаше бо ся, но не тако, якоже обычай детем, в среду же и пяток единою касашеся, и то к вечеру, от леваго же сосца отнюд не ссаше, прознаменуя десное жития его.

Глубиною мудрости промышляяй о всех Господь, прежде противны ветров тишину уготовляет, на Ариев убо плевел огнь вжигает, сего дивнаго реку и преславнаго святителя Николая рождество являет, прореченном от апостола Павла, егоже предуведе Бог, сего и предъизбра, и оправда и прослави.

Богородичен: Глубине таинству Богорождения Твоего кто не удивится, Пресвятая Дево Владычице; веков бо Творец вселися в Тя, и плоть от Тебе приим умну и словесну, вся человеки обожи.

Кондак глас 3.

Подобен: В Мирех, святе:

В Мирех рождься, святе Николае, от благородна корене, яко благоплодна ветвь прозябл еси, исполнь бо быв Божественных даров, яко солнце зарями весь мiр чудесы просветил еси, сего ради прославляем тя, яко ученика и таинника Божия благодати.

Ин кондак глас 3.

Яко звезда пресветлая просиял еси, блаженне Николае, посреде Ликии града от праведники родился еси, отче, и в честнем рождестве твоем чудна и славна тя показа Господь, и во святем младенстве твоем дивная явлена быша о тебе, Троицу бо проповедал еси трех часов стоянием честных ног твоих на земли в час рождения твоего, и от сосца деснаго питашеся, от леваго же никакоже, в среду же и в пяток единою, токмо во время вечернее, и оттого, отче, познан был еси воздержания нелестное правило, и яко имаши быти велий таинник Божия благодати.

Икос:

Приидите ныне с нами, братие, и купно духовне возвеселимся во святем торжестве Богоноснаго отца нашего святителя Николая, и прославим преславно рождшагося, и от утробы освященного, и Божественнаго Духа приимшаго, и Святую Троицу в час рождения своего стоянием ног своих проповедавшаго, и всех человек удивльшаго, хваляще святое и чудное рождество его. Любовию и правостию сердечною благодарная к нему сице рцем: Радуйся, от матерних ложесн Богу возложенная и от Него усвоенная и освященная главо, сокрушивый проклятому сатане главу. Радуйся, предъизбранный и освященный сосуде и Богу возложенный и возлюбленный. Радуйся, царем правоверным помоще и окормление, и на враги победа и одоление, и Православию утверждение. Радуйся, в Духа Святаго облеченный и на благодеяние благочестивым поданный. Радуйся, нечестивых потребителю и на страх их явленный. Радуйся, бесом прогонителю и еретиком обличителю. Радуйся, яко во святем рождестве твоем дивен всем познанный, яко имаши быти великий таинник Божия благодати.

Песнь 7

Ирмос: Трие отроцы в пещи:

От Троицы Бога проповедал еси, чудне Николае, темже и почести от Него венец приял еси, блаженне, и ныне в торжестве твоем усердно призывающих тя не забуди нас, раб своих, но свыше назирай, тя бо имамы крепка молитвенника.

Скрижаль в сердце своем от младенства, отче Николае, стяжав дивных добродетелей, написанну безсмертным пречистым перстом Христа Бога нашего, моли Его о нас, во еже написанным нам быти в книзе животней, святителю отче Николае досточудне.

Во святем рождестве твоем, святителю отче, Богом познан был еси и Бога познал еси, и весь бысть Божие жилище, весь явися орган духовный, возглашающ всяку добродетель Богодухновенных пений, спасения сказания и доброту являя Небеснаго Царствия, святителю Николае.

Богородичен: С Богом Заступницу Тя стяжахом, Ты бо Божия Мати бысть Творца и Содетеля, и наше воображение приемша Всенепорочная, и сие спасша от тли и смерти, и славою Божественною прославльшаго.

Песнь 8

Ирмос: Ангельми немолчно:

Ангелы дивятся, видяще преславная в час рождения твоего, отче Николае, человецы же радуются, приемлюще тя яко своего благодетеля и к Богу молитвенника неуклонна, всем бо явился еси радость спасения, милосерде Николае.

Кто не почудится или кто не прославит имене твоего, отче святителю, слыша на тебе выше закона естественнаго бывшая знамения в рождестве твоем, и тем яви тя Господь светильника всему мiру, во святем же младенстве твоем у матерних сосец показа тя изрядна и искусна, тем воистинну воздержанию нелестный учитель явился еси, святителю Николае.

Вторый Предтеча на земли явился еси на обличение беззакония, отче Николае. Ов бо обличи Ирода беззаконновавшаго, ты же, отче, вся ереси далече от Церкве отгнал еси и вся соблазны и беззакония, яко хврастия, огнем ревности своея попалил еси, верных же утвердил еси, милосерде Николае.

Богородичен: Дивлюся, святая Богоневесто Владычице, таинству Богорождения Твоего, всех бо Содетель в Тя вселися, и все человеческое естество на Небеса вознесе. Прибегающих под кров Твой приими и спаси ны, Богоблагодатная Владычице.

Песнь 9

Ирмос: Благословен Господь Бог Израилев:

Благословен еси Боже о всех, яже твориши, идеже бо хощеши, тамо побеждается естества чин, якоже и ныне в рождестве святителя Твоего выше закона естественнаго верным твоим дивная и пречудная явил еси, того молитвами, Христе, направи на путь мира.

Благословенна тя Богом, всем, отче Николае, благослови убо и мене, поющаго святое рождество твое, и руку помощи простри, и приведи к тихому пристанищу покаяния, яко да всегда славлю тя, отче Николае.

Аще и много беззаконновах аз окаянный, не отступаю надежди покрова твоего, отче Николае, всегда прибегаю и на тя надежду мою полагаю. Тем в нынешнем настоящем торжестве во святем твоем рождестве радостно вопию ти: ты мя, отче, избави от всякия скорби, и бед, и печалей, елика бо хощеши, и можеши.

Блаженне и Богоносе Николае, виждь тесноту души моея, како враг мой подвиже на мя брань на всяк день и не может истощити тулу стрел моих, но присно ураняет мя и почити ми не дает, аз же изнемогох, но ты, отче, сокруши козни его молитвами своими, яко да прием помощь твою святую, непрестанно славлю тя.

Богородичен: Никтоже прибегаяй под кров надежди Твоея, Пресвятая Богоневесто, тощь исходит, но всяк просяй приемлет скорую Твою помощь, юже и мне подаждь, Отроковице, поющему пресвятое Твое Рождество.

Светилен.

Воистину шлем и оружие на диавола непобедимое ты еси, отче Николае, от Бога явлен еси, христианом же поможение и утверждение, иерархом удобрение, в бедах же притекающим к тебе скорая помощь и заступление, святителю Господень. (дважды)

Слава, и ныне:

Облаче превышший небес, радуйся, искапающий нам каплю душеспасительную, Богородице, Ты Всеблагая, подаждь от Бога царем нашим победы на враги и междоусобия бурю утиши, елика бо хощеши, вся можеши, яко Мати Господня.

На хвалитех стихиры, на 4, глас 4.

Подобен: Дал еси знамение:

Дар благоприятен, от родительных рук Богу возложенный, и от Него усвоенный, и на пользу верным поданный, святителю Николае, темже в тебе упокоися благодать Пресвятаго Духа, славне, беззлобием возрастивши тя и мудростию украсивши.

Днесь память рождества твоего, святителю отче Николае, яко солнце нам Богоносия возсия, лучи богатых дарований просвещающи чтущих тя и верою блажащих, мглу же лютых отгоняющи, и прошения верным исполняющи, тем тя, досточудне, почитаем.

Божественную благодать от Бога приял еси, святителю Николае, юже прием свыше, и нас назирай, празднующих любовию честное твое рождество, и подаждь от Бога церквам единомыслие, и царем нашим победы на враги, и мiру умирение, и земли нашей благоплодие, и душам нашим велию милость.

Слава, глас 2:

От корене благаго благий прозябе плод, иже от младенчества освященный, и якоже Самуил в дар Богу возложенный, отче святителю Николае, Божиею бо благодатию паче, нежели млеком воспитанный, тем и на гору добродетелей взыде, преочищенну душу стяжав, и разум имея присно к Богу, небесное бысть жилище Духа, Христова обитель явися. Того, блаженне, моли о нас, еже спастися душам нашим.

И ныне, Богородичен: глас тойже: Яко плодовита маслина, Дева:

Таже славословие великое и отпуст.

 

НА ЛИТУРГИИ

Блаженны. Прокимен, Апостол, Евангелие и причастен все святительское.